Агенцтва Bloomberg распавяло пра размову прэм’ер-міністра Венгрыі Віктара Орбана і прэзідэнта Расіі Уладзіміра Пуціна, якая адбылася ў кастрычніку мінулага года. Агенцтва спасылаецца на стэнаграму гутаркі, з якой яно змагло азнаёміцца. У ёй Орбан выказвае гатоўнасць дапамагчы расійскаму прэзідэнту па многіх пытаннях.
«Учора наша сяброўства дасягнула такога высокага ўзроўню, што я магу дапамагчы любым спосабам. У любым пытанні, дзе я магу быць карысным, я да вашых паслуг», – прыводзяцца словы Орбана.
Далей, як піша агенцтва, венгерскі прэм’ер прыгадаў папулярную байку Эзопа, у якой мыш вызваляе льва, які трапіў у сетку. Да гэтага леў пашкадаваў жыццё мышы. Гэтая гісторыя выклікала ўсмешку ў Пуціна.
Большую частку размовы абодва суразмоўцы прысвяцілі выказванню падзякі адзін аднаму, а таксама Дональду Трампу. Напярэдадні абодва размаўлялі з прэзідэнтам ЗША пра патэнцыйны саміт у Будапешце, які ў выніку не адбыўся. Арганізацыі такой сустрэчы была прысвечана большая частка размовы.
У размове Віктар Орбан таксама казаў пра тое, як мацнела сяброўства з Пуціным з моманту сустрэчы ў Санкт-Пецярбургу ў 2009 годзе.
«Чым больш сяброў у нас будзе, тым больш магчымасцяў супрацьстаяць нашым праціўнікам», – прыводзіць агенцтва яшчэ адну цытату Орбана.
Венгерскі прэм’ер таксама наракаў на тое, што не мог сустракацца з Пуціным рэгулярна і асабіста, як гэта было да пандэміі.
Затым Пуцін высока ацаніў «незалежную і гнуткую» пазіцыю Венгрыі ў дачыненні да вайны Украіны.
«Нам незразумела, чаму такая збалансаваная, умераная пазіцыя спараджае толькі контраргументы», – сказаў Пуцін.
Нагадаем, нядаўна былі таксама апублікаваныя размовы міністра замежных спраў Петэра Сіярта з яго расійскім калегам Сяргеем Лаўровым. Усе гэтыя публікацыі з’яўляюцца на фоне выбарчай кампаніі ў Венгрыі. Парламенцкія выбары адбудуцца 12 красавіка. Паводле апытанняў, пакуль лідыруе апазіцыя Віктару Орбану.
