Офіс Святланы Ціханоўскай правёў першасны этап унутранай праверкі і прыпыніў супрацоўніцтва з палітолагам Алінай Харысавай, з якой меў валанцёрскае пагадненне.
Нагадаем, на дзяржаўным ТБ заявілі, што Аліна Харысава перадавала інфармацыю КДБ, думаючы, што супрацоўнічае са Службай бяспекі Украіны. Харысава патлумачыла, што каля года таму ўступіла ў перапіску з чалавекам, які прадставіўся супрацоўнікам СБУ, але не перадавала яму адчувальнай інфармацыі і спрабавала спыніць камунікацыю.
Паводле вынікаў першаснага этапу ўнутранай праверкі Офіс Ціханоўскай заявіў, што Харысава груба парушыла пратаколы бяспекі, але не перадавала адчувальнай інфармацыі трэцім асобам.
«Устаноўлена, што восенню 2025 года Аліна Харысава, якая мае валанцёрскае пагадненне з Офісам Святланы Ціханоўскай, насуперак інструкцыям і правілам бяспекі ўступіла ў камунікацыю з невядомымі асобамі, якія прадстаўляліся супрацоўнікамі ўкраінскіх спецыяльных службаў і заяўлялі пра магчымасць аказання дапамогі ў сувязі з ціскам на яе і яе сям’ю з боку структур рэжыму Лукашэнкі.
Дадзеная камунікацыя груба парушае ўнутраныя пратаколы бяспекі, якія дзейнічаюць у Офісе. У сувязі з гэтым была прызначана і праведзена праверка, падчас якой спецыялістамі па бяспецы не было выяўлена пацверджанняў перадачы якой-небудзь адчувальнай, службовай або непублічнай інфармацыі, здольнай нанесці шкоду дзейнасці Офіса, бяспецы яго супрацоўнікаў і супрацоўніц, партнёраў, а таксама беларусаў і беларусак, якія звярталіся па дапамогу. Аналіз наяўных матэрыялаў таксама не пацвердзіў фактаў перадачы ўнутраных дакументаў або іншых закрытых звестак.
Праверка працоўных і асабістых прылад, акаўнтаў і даступных матэрыялаў не выявіла прыкмет атрымання ўзнагароджання за меркаванае супрацоўніцтва з трэцімі асобамі, у тым ліку выкарыстання крыптавалютных кашалькоў або атрымання іншых плацяжоў, а таксама пошукавых запытаў, звязаных з атрыманнем грашовых сродкаў якім-небудзь спосабам, альбо слядоў выкарыстання праграм для пераводу грошай з дапамогай крыптавалют», — заяўляе Офіс Ціханоўскай.
Падчас праверкі вывучаліся апублікаваныя аўдыязапісы, матэрыялы перапіскі, гісторыі браўзераў, праграмы, файлы, працоўныя прылады і акаўнты Харысавай. У аўдыязапісах і скрыншотах, распаўсюджаных прапагандай, былі выяўлены «прыкметы генерацыі з выкарыстаннем тэхналогій штучнага інтэлекту». Гэта ставіць пад сумнеў іх сапраўднасць, адзначае Офіс.
Харысава пацвердзіла, што на працягу доўгага часу падвяргалася пераследу і спробам уздзеяння з боку спецслужбаў, але Офіс заяўляе, што гэтыя абставіны «не могуць разглядацца як падстава для адступлення ад устаноўленых правілаў бяспекі».
Офіс прыпыніў супрацоўніцтва з Харысавай. Праверка працягваецца.
«На дадзены момант удзел Аліны Харысавай у любой дзейнасці Офіса прыпынены. Праверка па дадзеным інцыдэнце працягваецца. У Офісе будуць перагледжаны дзеючыя пратаколы бяспекі і праведзены дадатковыя трэнінгі для супрацоўнікаў і супрацоўніц, а таксама валанцёраў і асоб, якія ўзаемадзейнічаюць з Офісам у рамках экспертнай і кансультацыйнай дзейнасці», — гаворыцца ў заяве.
Раней Харысава прыпыніла свой удзел у спісе «Еўрапейскі выбар» у Каардынацыйнай радзе, супрацоўніцтва з любымі арганізацыямі і ініцыявала праверку ў дачыненні да сябе.
