Нацыянальны банк у бліжэйшы час вернецца да пытання зніжэння стаўкі рэфінансавання. Пра гэта паведаміў начальнік галоўнага ўпраўлення манетарнай палітыкі і эканамічнага аналізу Нацбанка Дзмітрый Мурын.
“Мы бачым, што фундаментальныя эканамічныя фактары, якія раней аказвалі моцнае праінфляцыйнае ўздзеянне ўнутры краіны і з-за мяжы (перш за ўсё імпартаваная інфляцыя), паступова аслабляюцца. Усё гэта павышае верагоднасць таго, што ў бліжэйшыя месяцы на разгляд праўлення будзе выносіцца пытанне аб зніжэнні стаўкі рэфінансавання”, — сказаў ён, перадае БелТА.
Бліжэйшае пасяджэнне праўлення намечана на чэрвень. У чэрвені мінулага года Нацыянальны банк прыняў рашэнне павысіць стаўку рэфінансавання на 0,25 п.п. да 9,75% гадавых. Такім чынам, яе значэнне не змяняецца ўжо год.
Сёння Нацбанк на пашыраным пасяджэнні праўлення разглядае вынікі працы банкаўскай сістэмы ў першым квартале.
“Ацэньваючы асноўныя вынікі I квартала, можна казаць пра стабільную працу банкаўскай сістэмы, якая ў цэлым выконвае пастаўленыя перад ёй задачы. Ідзе ўстойлівае нарошчванне доўгатэрміновай рэсурснай базы банкаў. Попыт на крэдытныя рэсурсы з боку насельніцтва і эканомікі задавальняецца ў поўным аб’ёме. Інфляцыя запавольваецца. Яе дынаміка ў гадавым выражэнні складаецца ніжэй за мэтавую траекторыю. За студзень-сакавік 2026 года цэны выраслі на 1,6% пры гранічным параметры ў 2,5%”, — заявіў старшыня Нацбанка Раман Галоўчанка.
