З 22 снежня на сайце ўрада Польшчы запрацаваў сэрвіс на беларускай мове. Ён адрасаваны грамадзянам Беларусі, якія пражываюць у Польшчы. Раздзел размяшчаецца па адрасе www.gov.pl/web/by
Як паведамілі ў Аб’яднаным пераходным кабінеце, ідэя стварэння сэрвісу была выказаная намеснікам кіраўніка АПК Паўлам Латушкам падчас сустрэчы ў Канцылярыі прэм’ер-міністра Польшчы. Стварэнне раздзела заняло год.
Ён прызваны прадставіць максімальна шырокую інфармацыю па пытаннях легалізацыі для беларусаў, якія вымушана пакінулі сваю краіну і знаходзяцца ў Польшчы.
Як паведамілі ў АПК, плануецца пастаяннае абнаўленне інфармацыі ў раздзеле. Гэта будзе рабіцца на штоквартальнай аснове.
Увесь апублікаваны змест мае афіцыйны характар і падрыхтаваны на падставе дзеючых прававых нормаў, а таксама інфармацыі, прадстаўленай міністэрствамі і ведамствамі Польшчы.
«Адна з важных задач Аб’яднанага Пераходнага Кабінета і Каардынацыйнай Рады — максімальна аказваць садзейнічанне беларусам у вырашэнні праблемных пытанняў, з якімі сутыкаюцца беларусы за мяжой. Хацеў бы выказаць вялікую ўдзячнасць Канцылярыі Прэм’ер-міністра Польшчы і Урадаваму інфармацыйнаму цэнтру за гатоўнасць аказваць садзейнічанне беларусам і за падрыхтоўку сэрвісу для грамадзян Беларусі на беларускай мове. Гэта важны крок у кірунку падтрымкі беларусаў, якія апынуліся ў складанай жыццёвай сітуацыі.
Звяртаюся да беларусаў: калі ў вас ёсць тэмы, важныя для асвятлення на гэтым інфармацыйным сэрвісе, калі ласка, паведамляйце пра іх у Аб’яднаны Пераходны Кабінет», — пракаментаваў Павел Латушка.
На сайце прадстаўлена наступная інфармацыя:
- прысваенне нумара PESEL і рэгістрацыя,
- асновы легальнага знаходжання ў Польшчы,
- пенсія і пацвярджэнне працоўнага стажу,
- сямейныя выплаты для грамадзян Беларусі, якія пражываюць у Польшчы,
- дапамога і рэгістрацыя ва ўпраўленні працы,
- працэдура адкрыцця банкаўскага рахунку,
- гаспадарчая дзейнасць у Польшчы,
- абмен правоў кіроўцы.
Таксама падрыхтаваныя адказы на найбольш частыя пытанні і карысныя кантакты.
