Камітэт дзяржаўнага кантролю ўзбудзіў крымінальную справу ў дачыненні да двух прадпрымальнікаў, якія валодалі СТА для велікагрузных аўтамабіляў і крамамі запасных частак. Іх падазраюць у нявыплаце падаткаў у буйным памеры.
Падставай стала схема аптымізацыі падаткаў.
“Камерцыйная структура мела па ўсёй краіне рознічную сетку з 30 крам і станцый тэхнічнага абслугоўвання грузавых аўтамабіляў. Памеры атрымліваемай выручкі не дазвалялі ўжываць спрошчаную сістэму падаткаабкладання. Але выхад уладальнікі кампаніі знайшлі. Для незаконнай мінімізацыі падаткаў яны арганізавалі рэгістрацыю ў Мінску двух прадпрыемстваў, якія ўжываюць спрошчаную сістэму падаткаабкладання”, – распавялі ў КДК.
Атрыманая выручка размяркоўвалася паміж асноўнай кампаніяй і дадаткова створанымі суб’ектамі.
У выніку, паводле версіі КДК, з 2022 года кампанія недаплаціла ў бюджэт больш за 1,2 млн рублёў.
“Прычыненая дзяржаве шкода кампенсавана падазраванымі ў поўным аб’ёме. Вядзецца папярэдняе расследаванне”, – дадалі ў КДК.