Пасля таго як ЗША ў суботу адмянілі санкцыі на пастаўкі беларускіх калійных угнаенняў, Міністэрства замежных спраў Літвы адзначае, што ў Еўрапейскім саюзе такія пытанні не абмяркоўваюцца.
«ЗША прымаюць самастойныя рашэнні па санкцыях супраць беларускага рэжыму, якія не звязаныя з санкцыямі Еўрапейскага саюза. У ЕС не вядзецца ніякіх абмеркаванняў аб змякчэнні санкцый у дачыненні да беларускага рэжыму», — гаворыцца ў каментарыі міністэрства, перадае LRT.
У ім таксама падкрэсліваецца, што ніводная з прычын, па якіх ЕС пачаў ужываць санкцыі да Беларусі, не знікла — унутраныя рэпрэсіі, падрыў дэмакратыі, інструменталізацыя міграцыі, дапамога Расіі ў вядзенні агрэсіі супраць Украіны, а цяпер — і камбінаваная гібрыдная атака.
«Вызваленне палітычных зняволеных — важнае дасягненне дыпламатыі, аднак пазіцыя Літвы застаецца нязменнай: дзеянні, якія здзяйсняе Беларусь, наносяць сур’ёзную шкоду бяспецы Літвы, ЕС і НАТА», — заявілі прадстаўнікі міністэрства.
Рэжым у Мінску ў суботу вызваліў у агульнай складанасці 123 палітычных зняволеных: дзевяць з іх былі дэпартаваныя ў Літву, астатнія — ва Украіну. Сярод вызваленых — палітыкі Віктар Бабарыка, Марыя Калеснікава, а таксама лаўрэат Нобелеўскай прэміі міру Алесь Бяляцкі.
