Беларусь занепакоеная сітуацыяй вакол Кубы. Існуе пагроза гуманітарнага крызісу. З такой заявай выступіла Міністэрства замежных спраў.
“Міністэрства замежных спраў Рэспублікі Беларусь з занепакоенасцю сочыць за сітуацыяй вакол Кубы і паставак энергарэсурсаў у гэту краіну.
Асаблівыя асцярогі выклікае пагроза перарастання цяперашняй эскалацыі ў Карыбскім басейне ў сур’ёзны гуманітарны крызіс з непрагназуемымі наступствамі.
Мінск нязменна настойвае на недапушчальнасці прымянення аднабаковых прымусовых мер, якія ствараюць перашкоды для гандлёвых адносін паміж дзяржавамі, стрымліваюць працэс усебаковага сацыяльна-эканамічнага развіцця і ўскладняюць забеспячэнне дабрабыту насельніцтва.
Цвёрда перакананыя ў тым, што ўсе рознагалоссі павінны вырашацца шляхам мірнага дыялогу і ў рамках міжнароднага права”, — гаворыцца ў заяве.
Нагадаем, прэзідэнт ЗША Дональд Трамп абвясціў надзвычайнае становішча ў сувязі з пагрозай, якая існуе з боку Кубы. Ва ўказе аб НС ён даручыў уводзіць дадатковыя мытныя пошліны ў дачыненні да краін, якія пастаўляюць нафту на востраў.
