Міністэрства эканомікі вынесла на грамадскае абмеркаванне праект указа аб удасканаленні дзейнасці садаводчых таварыстваў. Абмеркаванне праходзіць на Прававым форуме да 18 чэрвеня.
Праект прадугледжвае ўвядзенне новых забарон. У адпаведнасці з ім, пры здачы садовых домікаў фізічным асобам для кароткатэрміновага пражывання будуць забароненыя:
- дзейнасць па арганізацыі адпачынку і забаў,
- прадастаўленне паслуг па арганізацыі і правядзенні культурна-відовішчных, спартыўна-масавых мерапрыемстваў,
- прадастаўленне паслуг лазні (саўны).
Такую прапанову Мінэканомікі абгрунтоўвае тым, што садаводчае таварыства — некамерцыйная арганізацыя, заснаваная на членстве грамадзян, якая ствараецца ў мэтах вядзення калектыўнага садаводства, а таксама паступленнем у дзяржаўныя органы зваротаў грамадзян, якія сведчаць пра злоўжыванні ў гэтай сферы.
“Улічваючы, што арандаваны садовы домік можа выкарыстоўвацца групай людзей (абмежаванняў па колькасці асоб, якія адначасова арандуюць садовы домік, няма), такое выкарыстанне нярэдка суправаджаецца прадастаўленнем (прыцягненнем) паслуг па арганізацыі і правядзенні свят, банкетаў, юбілеяў, іншых мерапрыемстваў масавага характару, што з’яўляецца крыніцай павышанага шуму (музыкі, гучных размоў, крыкаў і да т.п.), забруджвання навакольнага асяроддзя дымам (мангалы, вогнішчы, топка лазні і да т.п.), непажаданага ўзаемадзеяння з суседнімі землекарыстальнікамі і выклікае справядлівае незадавальненне грамадзян — членаў садаводчых таварыстваў.
А калі садовы домік здаецца на кароткатэрміновы перыяд, г.зн. рэгулярна, то такая прадпрымальніцкая дзейнасць, якая прыносіць даход адным грамадзянам, парушае правы і законныя інтарэсы суседніх землекарыстальнікаў, якія прэтэндуюць на спакойнае баўленне часу на сваіх зямельных участках у садаводчым таварыстве.
Таксама адзначаем, што такое выкарыстанне садовага доміка (адначасова з лазняй, альтанкай і прылеглай зонай адпачынку) выходзіць за межы дазволенага ГК прадастаўлення садовага доміка толькі ў арэнду і ўяўляе сабой дзейнасць, якая паводле прыкмет часткова ідэнтыфікуецца з дзейнасцю па аказанні паслуг у сферы аграэкатурызму, дазволенай да ажыццяўлення толькі ў населеных пунктах (садаводчае таварыства не з’яўляецца населеным пунктам)”, — лічаць у міністэрстве.
Там прапануюць прыцягваць да адміністрацыйнай адказнасці за парушэнне новых нормаў у адпаведнасці з ч. 4 арт. 13.3 КаАП («Незаконная прадпрымальніцкая дзейнасць»). Для гэтага патрабуецца распаўсюдзіць дзеянне артыкула на асоб, якія здаюць у арэнду садовыя домікі, а таксама прадастаўляюць паслугі па правядзенні свят, юбілеяў, вяселляў, банкетаў, прэзентацый, спартыўна-масавых, фізкультурна-аздараўленчых, культурных мерапрыемстваў, а таксама паслугі лазні. Санкцыя паводле гэтай часткі прадугледжвае штраф ад 10 да 30 базавых велічынь.
Праектам таксама прадугледжваецца:
- спрашчэнне працэдуры перадачы ва ўласнасць Рэспублікі Беларусь ліній электраперадачы садаводчых таварыстваў шляхам адмены неабходнасці канфіскацыі і прадастаўлення зямельных участкаў для будаўніцтва і абслугоўвання аб’ектаў электрычных сетак;
- змяненне нормы, якая датычыцца прыняцця рашэння агульнага сходу аб звароце з заявай пра ўключэнне тэрыторыі таварыства ў межы населенага пункта альбо пра ўтварэнне на базе таварыства населенага пункта пры ўмове аднагалоснага ўхвалення ўсімі членамі таварыства, — усталёўваецца магчымасць прыняцця такога рашэння, калі за яго прагаласуе кваліфікаваная большасць (г.зн. не менш за 2/3) ад агульнай колькасці членаў таварыства.
