Аляксандр Лукашэнка задаволены тым, што вышэйшыя сілы зарыентавалі яго сябраваць з Кітаем. Пра гэта ён заявіў сёння на сустрэчы з намеснікам старшыні Кітайскай Народнай Рэспублікі Хань Чжэнам.
“Добра, што вы прыехалі ў гэты час да нас. У вас ёсць магчымасць бліжэй на практыцы пазнаёміцца з нашай краінай. Што тычыцца нашых адносін, яны складваліся на працягу апошніх дзесяцігоддзяў. У Беларусі пра Кітай вельмі шмат гавораць. За гэтымі размовамі, палітычнымі нашымі адносінамі адбыўся вельмі бурны рост гандлёва-эканамічных адносін. І мы вельмі задаволеныя, што ў свой час Гасподзь дапамог нам зарыентавацца менавіта на Кітайскую Народную Рэспубліку”, — сказаў ён, перадае яго прэс-служба.
“Усепагоднае і ўсебаковае супрацоўніцтва з Кітайскай Народнай Рэспублікай прывяло нас да ўсёабдымнага супрацоўніцтва. Няма той сферы, якая не выклікала б нашай цікавасці ў Кітайскай Народнай Рэспубліцы”, — дадаў ён.
Лукашэнка таксама запэўніў госця, што Беларусі няма ў чым папракнуць, а тэма адносін з Кітаем ніколі не закранаецца ў перамовах з трэцімі асобамі.
“Прабачце за нясціпласць, але адважуся сказаць пра тое, што Кітайская Народная Рэспубліка, кіраўніцтва рэспублікі, нават калі б і хацела нам прад’явіць нейкія прэтэнзіі, не змагло б. Таму што мы свята выконваем усе нашы дамоўленасці. Любыя перамовы, з кім бы ні вялі — з расіянамі, еўрапейцамі ці амерыканцамі, — КНР заўсёды выносіцца за дужкі. Нашы адносіны не падлягаюць нават абмеркаванню. Вы на нас можаце разлічваць як на самых надзейных сяброў і прыхільнікаў”, — сказаў ён.
У сваю чаргу Хань Чжэн падзякаваў за цёплы прыём. Перадаў прывітанне ад старшыні КНР Сі Цзіньпіна. Намеснік старшыні КНР нагадаў, што летась лідары краін сустракаліся двойчы і “намецілі новыя грандыёзныя планы для далейшага ўмацавання двухбаковых адносін”. Ён таксама адзначыў, што падпісанне Лукашэнкам дырэктывы аб напаўненні ўсепагоднага і ўсебаковага стратэгічнага партнёрства ў поўнай меры адлюстроўвае “высокае разуменне развіцця нашых адносін і сведчыць пра тое, што наша супрацоўніцтва мае стратэгічнае значэнне”.
