Літоўскія памежнікі затрымалі 11 мігрантаў пры спробе парушыць мяжу з боку Беларусі. Інцыдэнт адбыўся ў пятніцу ў Швянчонскім раёне.
Як распавялі ў Службе аховы дзяржаўнай мяжы, спроба парушэння каля населенага пункта Атаўкай была заўважана з дапамогай камер назірання. Мігрантам аказвалі дапамогу два чалавекі з беларускага боку. Адзін з іх перарэзаў віткі калючага дроту і пашкодзіў памежную агароджу. 11 мігрантаў прайшлі праз гэтую праломіну. Другі мужчына вёў назіранне. Пасля таго, як мігранты апынуліся на літоўскім баку, абодва памочнікі зніклі ў глыбіні беларускай тэрыторыі. Літоўскія памежнікі мяркуюць, што памочнікі могуць мець дачыненне да беларускіх службаў.
На пошук мігрантаў былі накіраваны нарады пры падтрымцы кіналагічнай службы, а таксама памежны верталёт. Парушальнікаў затрымалі. Ім ад 21 да 26 гадоў. Пяць чалавек з’яўляюцца грамадзянамі Пакістана, яшчэ пяць — Афганістана і адзін — Ірана. У сямі затрыманых былі дакументы, астатнія дакументаў не мелі.
Парушальнікаў выдварылі з Літвы, папярэдне ўручыўшы ім гуманітарныя пакеты з прадуктамі харчавання і прадметамі першай неабходнасці.
У гэтым годзе літоўскія памежнікі зарэгістравалі 76 спробаў парушыць мяжу.
