Літоўскія палітыкі па выніках сённяшняй сустрэчы ў прэзідэнта краіны Гітанаса Наўседы пагадзіліся з неабходнасцю змяніць або адмяніць змешчаную ў Канстытуцыі забарону на размяшчэнне ядзернай зброі.
«Літва — адзіная краіна НАТА, дзе дзейнічае падобная канстытуцыйная забарона. Абсалютная большасць краін НАТА не маюць ніякіх прававых абмежаванняў. У краінах нашага рэгіёна, Польшчы, Латвіі і Эстоніі, такіх абмежаванняў няма; Фінляндыя некалькі тыдняў таму змяніла сваё заканадаўства і адмяніла абмежаванні», — сказаў Наўседа на сустрэчы.
«Мы павінны даць выразны сігнал пра тое, што Літва з’яўляецца паўнапраўным удзельнікам ядзернага стрымлівання НАТА. Гэта наймацнейшы сігнал для стрымлівання агрэсіі праціўніка. Таму я заклікаю вас абмеркаваць магчымасць унясення паправак у Канстытуцыю Літоўскай Рэспублікі шляхам выдалення артыкула 137.
Гэта павінна стаць пытаннем нацыянальнай згоды. Я заклікаю старшыню Сейма ўзяць на сябе ініцыятыву па мабілізацыі неабходнай падтрымкі членаў Сейма для пачатку працэдуры ўнясення паправак у Канстытуцыю», — дадаў ён.
Пасля сустрэчы Наўседа заявіў, што меркаванні лідараў фракцый Сейма фактычна супадалі. Паводле яго слоў, яны выказвалі меркаванне, што дадзены артыкул Асноўнага закона састарэў і павінен быць проста выдалены. Прэзідэнт Літвы выказаўся за тое, каб змены ў Канстытуцыю былі прыняты Сеймам, бо арганізацыя рэферэндуму па гэтым пытанні зойме шмат часу.
Старшыня Сейма Юозас Олекас пацвердзіў згоду з пазіцыяй Наўседы.
«Сёння, як мне здаецца, мы прыйшлі да агульнага меркавання, што ў нас ёсць кансэнсус адносна магчымасці прапанаваць выключыць гэты артыкул з Канстытуцыі і забяспечыць, каб Літва не была слабым звяном у ланцугу стрымлівання НАТА», — сказаў ён, перадае LRT.
Паводле яго слоў, ён збіраецца ўнесці гэтае пытанне ў Сейм у чацвер. Олекас выказаў надзею, што да канца восеньскай сесіі папраўка ў Канстытуцыю будзе ўнесена.
