Служба дзяржаўнай бяспекі Латвіі (VDD) рэкамендуе грамадзянам устрымацца ад паездак у Беларусь і Расію на Вялікдзень і папярэджвае пра высокія рызыкі разведкі, вярбоўкі і правакацый у гэтых краінах.
VDD звяртае ўвагу, што мэтай беларускіх або расійскіх спецслужбаў можа стаць любы чалавек незалежна ад роду заняткаў, а магчымасці Латвіі дапамагчы сваім грамадзянам, якія трапілі ў цяжкую сітуацыю ў гэтых краінах, абмежаваныя.
Калі паездка ўсё ж неабходная, VDD рэкамендуе не браць свой мабільны тэлефон, асабліва калі ў ім ёсць працоўная або адчувальная інфармацыя, паколькі дадзеныя могуць быць вынятыя на мяжы, а на тэлефон можа быць усталявана шпіёнскае ПЗ. Лепш узяць у паездку іншы тэлефон з перадаплачанай SIM-картай і пазбавіцца ад яго пасля паездкі. Таксама не рэкамендуецца браць з сабой ноўтбук і носьбіты дадзеных.
VDD папярэджвае, што спробы вярбоўкі могуць адбывацца ўжо на мяжы. Супрацоўнікі спецслужбаў могуць выдаваць сябе за памежнікаў або работнікаў іншых устаноў. Яны могуць пытацца пра палітычную і эканамічную сітуацыю ў Латвіі, інфраструктуру ў памежнай зоне і інфраструктуру НАТА. Таксама могуць задаваць пытанні пра ваенную і гуманітарную дапамогу Латвіі Украіне, пра стаўленне грамадства да Украіны і ўкраінцаў, а таксама цікавіцца асабістымі тэмамі: палітычныя погляды, месца працы, месца працы сваякоў і сяброў, кантакты ў тэлефоне, фінансавае становішча, стаўленне да Расіі, Украіны, НАТА і ЕС.
Служба дзяржаўнай бяспекі Латвіі звяртае ўвагу, што супрацоўнікі спецслужбаў могуць агрэсіўна выстаўляць абвінавачанні ў якім-небудзь парушэнні або злачынстве і прапаноўваць супрацоўніцтва ў абмен на вызваленне ад адказнасці або спрошчанае праходжанне памежнага кантролю.
Пералічваюцца прыкметы, якія могуць сведчыць пра кантакт з супрацоўнікамі спецслужбаў:
- незвычайна ўзмоцненая праверка і допыт;
- апытанне вядзе чалавек у цывільнай вопратцы, а не ў форме памежніка;
- задаюцца пытанні, не звязаныя з кампетэнцыяй памежнай службы.
