Намеснік кіраўніка Аб’яднанага пераходнага кабінета Беларусі, кіраўнік НАУ Павел Латушка правёў сустрэчу з паслом Латвіі ў Польшчы Раймандсам Янсансам. Бакі абмеркавалі дзейнасць беларускіх дэмакратычных інстытутаў, сітуацыю на межах Беларусі з ЕС і далейшыя крокі па ўзмацненні ціску на рэжым Аляксандра Лукашэнкі.
Латушка праінфармаваў латвійскага дыпламата аб працы АПК і Каардынацыйнай рады, а таксама аб узаемадзеянні з Еўрапейскім саюзам і падрыхтоўцы чарговага пасяджэння кансультатыўнай групы «Дэмакратычная Беларусь — Еўрапейскі саюз».
Асобнай тэмай размовы стала сітуацыя на межах Беларусі з Латвіяй, Літвой і Польшчай. Удзельнікі сустрэчы абмеркавалі «агрэсіўныя гібрыдныя дзеянні рэжыму Лукашэнкі», паведамляе прэс-служба АПК.
Асаблівая ўвага была нададзена далейшым крокам па вызваленні палітычных зняволеных і праблеме экстэрытарыяльнага пераследу беларусаў, якія пражываюць у краінах ЕС.
Бакі сышліся ў меркаванні, што санкцыйны ціск прымушае беларускія ўлады ў апошнія дні публічна дэманстраваць імкненне да нармалізацыі адносін з Еўрапейскім саюзам. У гэтай сувязі Латушка падкрэсліў неабходнасць выразнага і адназначнага сігналу з боку Бруселя і еўрапейскіх сталіц аб тым, што дыялог магчымы толькі пры ўмове рэальных, а не фармальных змен унутры краіны, спынення рэпрэсій, падтрымкі агрэсіі Расіі супраць Украіны і гібрыдных дзеянняў у дачыненні да суседніх дзяржаў.
Таксама Латушка распавёў аб працы НАУ па прыцягненні Аляксандра Лукашэнкі і яго атачэння да міжнароднай крымінальнай адказнасці за ўчыненыя міжнародныя злачынствы і заклікаў Латвію падтрымаць гэтыя намаганні.
Пасол Латвіі выказаў падтрымку дзейнасці дэмакратычных сіл Беларусі і беларускага грамадства.
Ён таксама наведаў выставу ў Музеі свабоднай Беларусі «Кропка ўваходу — 123», прысвечаную 123 беларускім палітвязням, вызваленым 13 снежня і прымусова дэпартаваным з краіны.
