На пасяджэнні прававога камітэта Парламенцкай асамблеі Савета Еўропы намеснік кіраўніка Аб’яднанага пераходнага кабінета Павел Латушка ініцыяваў унясенне папраўкі ў рэзалюцыю ПАСЕ «Барацьба з транснацыянальнымі рэпрэсіямі».
Папраўка дапоўніла палажэнне рэзалюцыі аб прыцягненні вінаватых у транснацыянальных рэпрэсіях да адказнасці ўказаннем на тое, што пераслед павінен ажыццяўляцца ў тым ліку праз адпаведныя міжнародныя механізмы крымінальнага правасуддзя.
Каментуючы прыняцце папраўкі, Латушка заявіў, што транснацыянальныя рэпрэсіі рэжыму Лукашэнкі ажыццяўляюцца ў маштабе і з ужываннем практык, якія адпавядаюць паняццю «злачынства супраць чалавечнасці», і маюць беспрэцэдэнтны для Еўропы характар. Ён нагадаў, што 12 сакавіка Офіс пракурора Міжнароднага крымінальнага суда абвясціў аб пачатку расследавання «беларускай сітуацыі», якая датычыцца дэпартацыі і пераследу шляхам дэпартацыі.
«Гэтыя дзеянні заключаюцца ў спыненні выдачы пашпартоў за мяжой, непасрэдных пагрозах жыццю і здароўю пераследаваных, пагрозах у адрас іх блізкіх сваякоў, арышце і канфіскацыі маёмасці. Ужыванне „судовага харасменту“ [judicial harassment] праз масавыя палітычна матываваныя крымінальныя справы за праяўленне палітычнай волі па-за межамі Беларусі, завочныя суды, пазбаўленне права на эфектыўную абарону падчас такіх працэсаў — гэта таксама элемент транснацыянальных рэпрэсій», — падкрэсліў Латушка.
Усё гэта — акты злачынства супраць чалавечнасці як злачынства пераследу праз дэпартацыю, якія робяць немагчымым вяртанне ў Беларусь дзясяткам тысяч беларусаў, адзначыў ён.
Палітык лічыць мэтазгодным падкрэсліць патэнцыял міжнародных механізмаў крымінальнага правасуддзя ў супрацьдзеянні транснацыянальным рэпрэсіям.
Раней падчас зімовай сесіі ПАСЕ Павел Латушка выступаў на спецыяльным мерапрыемстве ў ПАСЕ з інфармацыяй пра маштаб транснацыянальных злачынстваў, якія ажыццяўляюцца рэжымам Лукашэнкі супраць беларусаў. Перададзеныя дакладчыку матэрыялы былі ўлічаны пры падрыхтоўцы рэзалюцыі.
