Міністр унутраных спраў Беларусі Іван Кубракоў правёў рабочую нараду ў Віцебску ў сувязі з прыездам у вобласць работнікаў з Узбекістана.
Як паведамляе МУС, усе, хто прыехаў, ужо размеркаваны па прадпрыемствах і арганізацыях Віцебскай вобласці.
Кубракоў адзначыў, што МУС праводзіць мерапрыемствы, накіраваныя на прафілактыку правапарушэнняў з удзелам замежнікаў. Паводле яго слоў, сітуацыя застаецца кантраляванай і не ўплывае на грамадскую бяспеку і грамадска-палітычную абстаноўку ў краіне.
Кіраўнік МУС заклікаў улічваць розніцу ў менталітэце і даступна тлумачыць замежным грамадзянам асаблівасці беларускага заканадаўства, прычым рабіць гэта ўжо ў аэрапорце.
«Трэба з разуменнем ставіцца. Часам людзі, калі пераязджаюць з аднаго раёна ў іншы раён, ёсць пэўная спецыфіка. Тут людзі прыехалі ў іншую краіну. Нам неабходна растлумачыць грамадзянам Узбекістана асаблівасці нашага заканадаўства. Гэта трэба рабіць у абавязковым парадку, пачынаючы ад аэрапорта. Усё давесці, усё расказаць», — заявіў Кубракоў.
Нагадаем, 13 ліпеня ў Віцебск прыляцелі 255 грамадзян Узбекістана для працы на прадпрыемствах вобласці. Як паведамлялася, ім абяцалі заробак 900–1000 долараў, аднак на месцы высветлілася, што гатовыя плаціць толькі 500 долараў, а жыллё і харчаванне трэба аплачваць самастойна. 15 ліпеня па СМІ разышліся відэа, у якіх тыя, хто прыехаў, скардзіліся на ўмовы і выказвалі гатоўнасць вярнуцца дадому. Да вечара таго ж дня адзін з грамадзян Узбекістана заявіў, што праблема вырашана, і папрасіў выдаліць сваё старое відэа, бо яго «маглі няправільна вытлумачыць».
