Суд Еўрапейскага саюза адхіліў пазоў літоўскай кампаніі Birių krovinių terminalas (BKT) бізнесмена Ігара Удавіцкага, звязаны з санкцыямі супраць транзіту беларускіх калійных угнаенняў. Раней стывідорная кампанія з порта Клайпеды забяспечвала перавалку беларускіх угнаенняў на судны.
Частка патрабаванняў пазову BKT была адхіленая ў траўні мінулага года. Яна датычылася абмежавальных мер ЕС, якія прывялі да спынення транзіту калію.
На гэтым тыдні суд паставіў кропку ў справе, поўнасцю адхіліўшы пазоў кампаніі. У прыватнасці, гаворка ідзе пра тое, што BKT падала пазоў са спазненнем. Таксама ў рашэнні гаворыцца, што Еўрапейскі суд не мае паўнамоцтваў змяняць рашэнні Савета ЕС па пытаннях знешняй палітыкі і даваць яму ўказанні.
Кампанія абвінавачвала Савет ЕС у бяздзейнасці праз адсутнасць удакладнення правілаў транзіту, аднак запыт быў накіраваны на адрас старшыні савета, а не самога Савета ЕС, таму патрабаванне было прызнана непрымальным. Акрамя таго, скаргі адносна кіруючых прынцыпаў і тлумачэнняў, падрыхтаваных Еўрапейскай камісіяй, былі адхіленыя, паколькі пазоў быў пададзены супраць Савета ЕС, а не супраць Еўрапейскай камісіі, якая прыняла гэтыя дакументы.
Кампанію таксама абавязалі пакрыць судовыя выдаткі, панесеныя Саветам ЕС у рамках разгляду справы.
