Кіраўнік Службы аховы дзяржаўнай мяжы Літвы (VSAT) Рустам Любаеў абвясціў пра адстаўку.
«Я перакананы, што ў сітуацыі, якая склалася цяпер, абавязаны прыняць рашэнне, якое будзе найбольш карысным для Службы аховы дзяржаўнай мяжы.
Рэагуючы на сумневы адносна Службы аховы дзяржаўнай мяжы, якія выказваюцца ў публічнай прасторы, і адчуваючы поўную адказнасць як за поспехі ўстановы, так і за яе няўдачы, я вырашыў сысці з пасады», — заявіў Любаеў.
Ён дадаў, што для яго самае важнае — стабільнасць у сістэме і нармальнае функцыянаванне службы.
Адстаўка адбылася пасля інцыдэнту з нападам мігрантаў на літоўскіх памежнікаў.
Нагадаем, 26 ліпеня памежнікі спрабавалі затрымаць мігрантаў, якія прабраліся ў Літву праз тунэль. Аднак затым з тунэля выйшлі яшчэ 20 чалавек і адбілі таварышаў, схаваўшыся на тэрыторыі Беларусі. Пазней стала вядома, што мігранты спрабавалі зацягнуць літоўскага памежніка на тэрыторыю Беларусі. Ён змог адбіцца, але атрымаў раненне і трапіў у бальніцу.
Першапачаткова VSAT паведаміла толькі пра выяўленне тунэля. Пасля таго, як інфармацыя пра сутычку з’явілася ў СМІ, было пачата ўнутранае расследаванне.
