Аляксандр Лукашэнка атрымаў новы падарунак падчас наведвання вытворчасці ААТ “Кідма Тэк”, якое займаецца выпускам стралковай зброі.
Як паведамілі ў прэс-службе Лукашэнкі, яму ў якасці падарунка ўручылі першы беларускі аўтамат ВСК-100Б. Падкрэсліваецца, што ён з’яўляецца цалкам айчынным.
“Не для вайны… Для ўпэўненасці ў міры!” — напісана на таблічцы да падарунка, перадае прэс-служба.
Яшчэ адзін асобнік Лукашэнка даручыў вырабіць для музея Палаца Незалежнасці.
Трэба адзначыць, што на прадстаўленай фатаграфіі падарунка магазін з патронамі не ўсталяваны, а ляжыць побач. У 2020 годзе падчас масавых дэманстрацый пасля выбараў Лукашэнка з’яўляўся каля Палаца Незалежнасці з аўтаматам без магазіна, дэманструючы гатоўнасць абараняць сваю ўладу.
Наведваючы вытворчасць “Кідма Тэк”, Лукашэнка ў чарговы раз падкрэсліў, што на полі бою лёс вырашаюць салдаты, а ім патрэбная менавіта стралковая зброя.
“На полі бою лёс вырашаюць людзі, салдаты. А для салдат трэба гэта. Без гэтай зброі мы нічога не зробім”, — сказаў ён.
Ён адзначыў, што вытворчасць цалкам лакалізаваная.
“Таму была пастаўленая задача — вырабляць сваё. І мы гэта зрабілі. Мы зрабілі гэта самі. Без гэтага няма ніякай вайны, ніякай абароны. Для таго, каб ваяваць, патрэбная стралковая зброя. Таму гэта вельмі важна. Гэта аснова любой арміі”, — сказаў ён.
“Кідма Тэк” уваходзіць у сістэму Дзяржкамваенпрама. Работы па стварэнні стралковай зброі на яго базе пачаліся ў 2018 годзе. У 2021 годзе быў прыняты на ўзбраенне аўтамат ВСК-100 пад патрон 7,62х39. Яго вытворчасць пачалі ў 2020 годзе з буйнавузлавой зборкі. Адзначаецца, што стварэнне цалкам лакалізаванай версіі аўтамата ВСК-100Б калібра 7,62 мм знаходзіцца на фінальнай стадыі.
Акрамя аўтамата ВСК-100Б плануецца вытворчасць і іншай наменклатуры стралковай зброі: высокадакладнай вінтоўкі з падоўжна-слізгальнай засаўкай тыпу “Стылет”, пісталета-кулямёта ПП-919, кулямёта тыпу ПКМ.
Да цяперашняга часу “Кідма Тэк” распрацавала 5 мадэляў і 6 мадыфікацый баявой стралковай зброі, з якіх 4 мадэлі прынятыя на ўзбраенне.
