Кіраўніцтва мінскай турыстычнай фірмы абвінавачваюць ва ўхіленні ад выплаты падаткаў праз замежных пасярэднікаў. Службовыя асобы кампаніі пакрылі шкоду і выехалі з Беларусі да ўзбуджэння крымінальнай справы.
Пракуратура Мінска ўзбудзіла крымінальную справу па матэрыялах праверкі Дэпартамента фінансавых расследаванняў КДК.
Згодна з матэрыяламі справы, уласнікі і службовыя асобы турфірмы ўключылі ў ланцужок “турагент – тураператар» неабгрунтаваных пасярэднікаў у выглядзе падкантрольных замежных кампаній, якія знаходзяцца на Кіпры і ў ААЭ, і з 2013 па 2023 год уносілі недакладныя звесткі пра фінансава-гаспадарчыя ўзаемаадносіны з кампаніямі. Такім чынам яны наўмысна занізілі падатковую базу арганізацыі і недаплацілі падатак на прыбытак і ПДВ на суму больш за 700 тысяч рублёў, паведамляе пракуратура.
Службовыя асобы турфірмы пагасілі шкоду амаль у поўным аб’ёме на этапе дасудовай праверкі і выехалі з Беларусі да ўзбуджэння крымінальнай справы аб ухіленні ад выплаты падаткаў (ч. 2 арт. 243 КК).
Крымінальная справа накіравана ў Следчы камітэт для папярэдняга расследавання.