Кіеўскі суд падоўжыў да 20 красавіка ўтрыманне пад вартай падазраванай у шпіянажы Інны Кардаш. Пра гэта паведамляе “Радыё “Свабода”. Журналістка, якая пераехала з Беларусі ва Украіну і доўгі час працавала ва ўкраінскіх СМІ, была затрымана ў канцы студзеня па падазрэнні ў шпіянажы на беларускі КДБ.
Паводле інфармацыі “Свабоды”, Кардаш утрымліваецца ў Кіеўскім следчым ізалятары. Яна скардзілася на неаказанне ёй медыцынскай дапамогі і ўмовы ўтрымання. Суддзя пры разглядзе хадайніцтва следства аб прадаўжэнні меры стрымання абавязаў кіраўніцтва СІЗА забяспечыць права Кардаш на атрыманне належнай медыцынскай дапамогі і належныя ўмовы ўтрымання.
У лютым пры разглядзе апеляцыі Кардаш на заключэнне пад варту пракурор паведамляў, што ўкраінскі бок прымае меры для абмену Кардаш.
Нагадаем, СБУ і ГУР паведамілі пра затрыманне Кардаш 27 студзеня. СБУ заяўляла, што яна супрацоўнічала з КДБ з 2015 года. Яна працавала на тэлеканале Медведчука «112» і ў «Інтэрфакс Украіна».
У 2020 годзе беларускія спецслужбы накіравалі Кардаш працаваць ва Украіну. У яе заданне ўваходзіў збор інфармацыі пра беларусаў і расіян, якія дапамагаюць Украіне. Таксама яна павінна была ўсталяваць кантакты з супрацоўнікамі пасольства Кітая ва Украіне, каб збіраць разведвальныя даныя пра дзейнасць кітайскіх дыпламатаў ва Украіне.
У 2025 годзе яна ўладкавалася на працу ў Каардынацыйны цэнтр ГУР па пытаннях абыходжання з ваеннапалоннымі, дзе збірала службовую інфармацыю — фатаграфавала дакументы і запісвала размовы супрацоўнікаў. Гэтыя даныя яна перадавала ў Беларусь.
