Вярхоўны прадстаўнік ЕС па замежных справах і палітыцы бяспекі Кая Калас назвала падзеі на Блізкім Усходзе небяспечнымі. Адначасова яна асудзіла Іран.
“Апошнія падзеі на Блізкім Усходзе небяспечныя. Іранскі рэжым забіў тысячы людзей. Яго праграмы балістычных ракет і ядзернай зброі, а таксама падтрымка тэрарыстычных груповак уяўляюць сур’ёзную пагрозу глабальнай бяспецы. ЕС увёў жорсткія санкцыі супраць Ірана і падтрымаў дыпламатычныя рашэнні, у тым ліку па ядзернай праблеме”, — напісала яна.
Паводле яе слоў, яна правяла размовы з кіраўнікамі МЗС Ізраіля і шэрагу краін рэгіёна. ЕС каардынуе свае дзеянні з арабскімі партнёрамі для вывучэння дыпламатычных шляхоў.
“Абарона грамадзянскага насельніцтва і захаванне міжнароднага гуманітарнага права з’яўляюцца прыярытэтам. Наша консульская сетка ў поўнай меры задзейнічана ў садзейнічанні выезду грамадзян ЕС. Неістотны персанал ЕС выводзіцца з рэгіёна.
Наша ваенна-марская місія Aspides застаецца ў стане павышанай гатоўнасці ў Чырвоным моры і гатовая дапамагчы забяспечыць бесперабойнасць марскога калідора”, — дадала яна.
Нагадаем, сёння раніцай Ізраіль пры падтрымцы ЗША атакаваў Іран. Былі нанесены ракетныя ўдары па ўрадавых будынках. ВПС Ізраіля працягваюць атакаваць аб’екты на тэрыторыі Ірана. У адказ Тэгеран ударыў па амерыканскіх ваенных аб’ектах у ААЭ, Бахрэйне, Кувейце і Катары.
