Еўразвяз перавёз цеплавую электрастанцыю з Літвы ва Украіну. Пра гэта паведамілі ў Еўракамісіі.
«Гэта беспрэцэдэнтная перадача аднаўляе крытычна важныя энергетычныя магутнасці і непасрэдна ўмацоўвае нацыянальную энергасетку Украіны пасля працяглых расійскіх атак на яе інфраструктуру. Абсталяванне мела вырашальнае значэнне для завяршэння аварыйных рамонтных работ у некалькіх рэгіёнах краіны, дзе энергетычная інфраструктура была сур’ёзна пашкоджаная. Яно здольнае забяспечыць электраэнергіяй каля аднаго мільёна ўкраінцаў», — гаворыцца ў заяве Еўракамісіі.
Аперацыя ажыццяўлялася на працягу 11 месяцаў, усяго было выканана 149 перавозак. Перавезена 2399 тон абсталявання. 40 рэйсаў былі звязаныя з негабарытнымі перавозкамі, у тым ліку з вельмі цяжкімі трансфарматарамі і статарамі вагой 172 тоны кожны.
Еўракамісія таксама адзначыла падтрымку польскага ўрадавага Агенцтва стратэгічных рэзерваў пры правядзенні аперацыі.
