Двух індывідуальных прадпрымальнікаў затрымалі ў Мінску па падазрэнні ў незаконным абароце наркотыкаў. Як паведамілі ў ГУУС Мінгарвыканкама, затрыманне правялі супрацоўнікі наркакантролю Першамайскага РУУС разам з АМАПам.
Устаноўлена, што мужчыны набылі на ценявой інтэрнэт-пляцоўцы каля трох грамаў метадону. Фігуранты забралі рэчыва з тайніка і збіраліся з’ехаць на асабістым аўто, але былі затрыманыя. Яны паспрабавалі пазбавіцца ад згортка з наркотыкам, выкінуўшы яго, аднак гэта не паўплывала на сітуацыю.
Вядома, што адзін з затрыманых раней ужо прыцягваўся да крымінальнай адказнасці за незаконны абарот наркотыкаў. Абодва мужчыны з’яўляюцца індывідуальнымі прадпрымальнікамі: адзін аказвае цырульніцкія паслугі, другі — спецыяліст у сферы геадэзіі.
Са слоў затрыманых, метадон яны набылі для ўласнага спажывання.
Па факце здарэння ўзбуджана крымінальная справа.