Прэзідэнт ЗША Дональд Трамп схіляецца да аднаўлення актыўных баявых дзеянняў супраць Ірана. Пра гэта паведамляе CNN са спасылкай на крыніцы.
Паводле іх інфармацыі, Трамп расчараваны тым, як іранскі бок вядзе перамовы, а таксама губляе цярпенне праз закрыццё Армузскага праліва. Таксама яму не дае спакою раскол у кіраўніцтве Ірана, з-за якога той нібыта не можа пайсці на ядзерную здзелку.
Унутры адміністрацыі Трампа існуюць розныя лагеры, якія рэкамендуюць розныя сцэнарыі. Некаторыя з іх, уключаючы Пентагон, выступаюць за больш агрэсіўны падыход. Іншыя настойваюць на працягу дыпламатычных перамоваў.
Таксама ў атачэнні Трампа хацелі б, каб Пакістан займаў больш жорсткую пазіцыю ў якасці пасярэдніка. Некаторыя чыноўнікі адміністрацыі Трампа даўно сумняваюцца, ці сапраўды пакістанцы агрэсіўна выказваюць незадаволенасць Трампа станам перамоваў, як гэта рабіў сам Трамп публічна. Паводле слоў двух крыніц, некаторыя прадстаўнікі адміністрацыі таксама лічаць, што Пакістан часта прадстаўляе ЗША больш пазітыўную версію іранскай пазіцыі, чым гэта адпавядае рэчаіснасці.
Тым часам у Іране заявілі пра поўную баявую гатоўнасць падводных лодак класа «Гадзір». Гэта невялікія субмарыны з экіпажам усяго з двух чалавек, адаптаваныя для дзеянняў на мелкаводдзі, напрыклад, у Армузскім заліве. Такія падлодкі могуць ляжаць на дне, яны абсталяваныя двума тарпеднымі апаратамі, могуць несці супрацькарабельныя ракеты і марскія міны.
