Кіраўніца Аб’яднанага пераходнага кабінета Святлана Ціханоўская пракаментавала падзеі ў Венесуэле, заявіўшы, што Аляксандр Лукашэнка ў асобе Нікаласа Мадуры губляе яшчэ аднаго саюзніка. Яна выказала падтрымку венесуэльскаму народу, пажадаўшы вярнуць вяршэнства права ў краіне.
«Маё сэрца сёння з народам Венесуэлы. Я жадаю венесуэльцам вярнуць справядлівасць, вяршэнства права і сапраўды свабодныя выбары — тое, чаго яны заслугоўваюць і за што доўга і мужна змагаліся», — заявіла лідарка дэмсіл.
«Падзеі ў Венесуэле нагадваюць усім нам: ніводная дыктатура не вечная. Эпоха злачыннага рэжыму Мадуры адыходзіць у мінулае — і разам з гэтым такі ж нелегітымны Лукашэнка губляе яшчэ аднаго саюзніка», — дадала палітык.
Нагадаем, сёння ЗША правялі шырокамаштабную аперацыю супраць Венесуэлы і яе лідара, прэзідэнта Нікаласа Мадуры. Прэзідэнт ЗША Дональд Трамп заявіў, што Мадура разам з жонкай «быў захоплены і вывезены з краіны».
Генеральная пракурорка ЗША Памела Бонды заявіла, што Нікаласу Мадуру і яго жонцы Сіліі Флорэс былі прад’яўлены абвінавачанні ў Паўднёвым акрузе Нью-Ёрка. Паводле яе слоў, Мадуру абвінавачваюць у змове з мэтай наркатэрарызму, змове з мэтай імпарту какаіну, незаконным валоданні кулямётамі і разбуральнымі прыладамі, а таксама ў змове з мэтай валодання кулямётамі і разбуральнымі прыладамі супраць ЗША.