Беларусь і Азербайджан плануюць інтэнсіфікаваць ваеннае супрацоўніцтва ў сферах, «якія ўяўляюць узаемную цікавасць». Дамоўленасць была дасягнута па выніках сустрэчы начальніка Генеральнага штаба — першага намесніка міністра абароны Беларусі генерал-маёра Паўла Муравейкі з першым намеснікам міністра абароны Азербайджана — начальнікам Генеральнага штаба генерал-палкоўнікам Керымам Веліевым.
Муравейка адзначыў, што беларуска-азербайджанскае супрацоўніцтва шмат у чым грунтуецца на даверлівых адносінах паміж Аляксандрам Лукашэнкам і Ільхамам Аліевым.
«Мы, вайскоўцы, проста абавязаныя, ідучы ва ўнісон за галоўнакамандуючымі, рухацца ў гэтым жа кірунку і развіваць супрацоўніцтва. Упэўнены, што тыя напрамкі, якія ў нас ужо ёсць, — гэта толькі першая прыступка развіцця больш шырокага, больш актыўнага ўзаемадзеяння.
Ужо сёння тыя мерапрыемствы, якія мы ўключылі ў сумесны план, рэалізуюцца як ніколі актыўна. Ільвіную долю ў гэтым адыгрывае ў тым ліку ваш асабісты ўклад, уклад Міністра абароны Азербайджана і тыя цёплыя адносіны, якія складваюцца паміж намі як кіраўнікамі адпаведных ведамстваў», — заявіў Муравейка.
Веліеў падкрэсліў, што Беларусь і Азербайджан павінны ўмацоўваць супрацоўніцтва і развіваць абмен досведам, паведамляе Мінабароны Беларусі.
