Падчас другога дня Мюнхенскай канферэнцыі па бяспецы Святлана Ціханоўская прыняла ўдзел у панэльнай дыскусіі «Беларусь у цэнтры ўвагі», каб абмеркаваць будучыню Беларусі ва ўмовах новай геапалітычнай рэальнасці. Таксама ў мерапрыемстве ўдзельнічалі міністр замежных спраў Літвы Кястуціс Будрыс, сенатар ЗША Пітэр Уэлч і дырэктар Цэнтра ўсходнееўрапейскіх і міжнародных даследаванняў Гвендалін Зассе.
Ціханоўская абазначыла ключавыя прыярытэты міжнароднай палітыкі ў дачыненні да Беларусі. Сярод іх – вызваленне палітвязняў без легітымізацыі рэжыму. Палітык падкрэсліла, што ўжо вызвалена каля 300 чалавек, аднак больш за тысячу застаюцца за кратамі, і рэпрэсіўная машына працягвае дзейнічаць.
“Лукашэнка вызваляе людзей не таму, што раптам стаў гуманным, а таму, што ўсе гэтыя санкцыі, уся гэтая палітыка ціску, ізаляцыі і непрызнання ў дадзены момант працуюць. І я вельмі ўдзячная нашым найбуйнейшым саюзнікам, такім як Літва, Польшча і іншыя краіны, якія ўсе гэтыя гады аказвалі ціск на рэжым і падтрымлівалі беларусаў.
Таму тут важна падкрэсліць, што гуманітарны трэк не роўны нармалізацыі сітуацыі, прызнанню або легітымізацыі Лукашэнкі. Мы павінны раздзяліць гэтыя трэкі, таму што пакуль Лукашэнка прадае людзей, у краіне няма ніякіх змен. Ён па-ранейшаму з’яўляецца незаконным кіраўніком, які працягвае рэпрэсіі ў краіне і здзяйсняе транснацыянальныя рэпрэсіі. Таму наша задача, канешне, у першую чаргу вызваліць людзей, але па-другое, вызваліць нашу краіну”, – заявіла яна.
Асаблівую ўвагу лідар дэмсіл надала рызыцы страты суверэнітэту праз ваенную інтэграцыю з Расіяй.
«Еўропа разумее, што пакуль Лукашэнка застаецца ва ўладзе, гэта будзе пастаянная пагроза бяспецы межаў Еўрапейскага саюза. Пытанне Беларусі павінна быць часткай усіх перамоваў аб бяспецы ў рэгіёне», – падкрэсліла яна.
Кіраўніца АПК заявіла, што ў цяперашні час не бачыць у Еўропы “ніякага жадання мяняць палітыку ў дачыненні да Беларусі”.
“Таму што я думаю, што ў Еўропе лепш разумеюць, што беларускі выпадак – гэта не толькі палітычная катастрофа або гуманітарная катастрофа ў Беларусі, але і пытанне бяспекі. І Еўропа вельмі зацікаўлена ў незалежнай Беларусі, якая з’яўляецца надзейным партнёрам не толькі для Еўропы, але і для Украіны.
І ўсе ў Еўропе разумеюць, што пакуль Лукашэнка ва ўладзе, гэта будзе пастаянная пагроза бяспецы межаў Еўрапейскага саюза, таму што мы ўжо бачым, як рэжым тэрарызуе Літву, напрыклад, з дапамогай паветраных шароў, якія парушаюць паветраную прастору, або накіроўваючы мігрантаў да межаў, або ўтрымліваючы літоўскія грузавікі на тэрыторыі Беларусі, або назапашваючы расійскую ваенную прысутнасць у Беларусі для магчымай эскалацыі супраць Украіны або супраць Еўропы. Таму я павінна паўтарыць пра стратэгічную важнасць свабоднай дэмакратычнай Беларусі для рэгіянальнай бяспекі”, – адзначыла яна.
Ціханоўская адзначыла неабходнасць падтрымкі беларусаў у выгнанні, забяспечваючы ім стабільны прававы статус, доступ да адукацыі, працы і банкаўскіх паслуг.
«Беларусы за мяжой — гэта людзі пад палітычным пераследам. Ім патрэбны стабільны прававы статус, дакументы для падарожжаў, доступ да адукацыі, працы і банкаўскіх паслуг. Нам трэба балансаваць ціск на рэжым з падтрымкай людзей, каб заставацца моцнай альтэрнатывай «рускаму свету» і падрыхтаваць для беларусаў лепшую будучыню», – заявіла палітык.