Старшыня КДБ Іван Церцель адрэагаваў на прапанову Аб’яднанага пераходнага кабінета аб круглым стале для ўрэгулявання палітычнага крызісу і заявіў, што гэтыя планы не здзейсняцца. Раней супраць правядзення круглага стала выказаўся Аляксандр Лукашэнка.
Церцель заявіў, што праціўнікі Беларусі нібыта імкнуцца змяніць канстытуцыйны лад у краіне.
«Я хацеў бы канстатаваць на падставе дакументальных матэрыялаў, якія дакладваюцца кіраўніку дзяржавы і на падставе якіх прымаюцца рашэнні, што доўгатэрміновыя планы нашых праціўнікаў не змяніліся. Асноўнае — гэта, безумоўна, геапалітычны перадзел у рэгіёне і спадарожныя мэты — гэта змена канстытуцыйнага ладу ў Рэспубліцы Беларусь, спроба нумар два», — заявіў Церцель пасля дакладу Лукашэнку 24 снежня.
Па назіраннях кіраўніка КДБ, дэмакратычныя сілы Беларусі змянілі тактыку і спрабуюць выйсці на моладзь і чыноўнікаў у Беларусі і арганізаваць круглы стол. Церцель падкрэсліў, што ніякага дыялогу не будзе.
«Разам з тым трансфармуецца тактыка, ідзе перапрацоўка падыходаў, як усё ж дасягнуць гэтых мэтаў. Ёсць пэўныя трэнды, якія цяпер спрабуюць рэалізаваць. У прыватнасці, гэта імкненне да нашай моладзі, імкненне да нашага дзяржаўнага апарату і рэалізацыя сцэнарыя так званага круглага стала.
Запэўніваем вас, што гэтыя планы не здзейсняцца. І ў гэтым плане як знешняя разведка, так і іншыя падраздзяленні Камітэта дзяржаўнай бяспекі працуюць па ўказанні нашага вярхоўнага галоўнакамандуючага, і ўсе перашкоды, каб сцэнарый, падобны да ўкраінскага, падрыхтаваны для нашай краіны, не быў рэалізаваны», — заявіў Церцель.
Нагадаем, у жніўні 2025 года АПК прыняў заяву аб правядзенні круглага стала для ўрэгулявання палітычнага крызісу ў Беларусі з удзелам усіх палітычных і грамадскіх сіл. Да працэсу прапаноўвалася прыцягнуць міжнародных пасярэднікаў у асобе краін-партнёраў і ключавых міжнародных арганізацый. АПК прапанаваў рэжыму Лукашэнкі выканаць мінімальныя ўмовы для пачатку дыялогу: вызваліць палітвязняў і спыніць рэпрэсіі.
Лукашэнка заявіў, што не збіраецца весці ніякіх перамоваў.
«Я з кім павінен садзіцца за стол? З тымі, хто разваліў краіну? Добра, я мог бы гэта пераступіць. Ну а які з іх толк? Яны што, нам нешта дапамогуць — народу, дзяржаве? Яны нам не памочнікі. А па брудзе хадзіць — можна брудам запэцкацца. Навошта гэта мне? Гэта мне не патрэбна. Мы нікому не забараняем размаўляць, калі ласка. Але мне з імі няма пра што гаварыць», — сказаў ён.
