У нідэрландскім Эйндховене 34-гадовы мужчына, які пражывае ў цэнтры размяшчэння суіскальнікаў прытулку, выратаваў жанчыну, аўтамабіль якой з’ехаў у канал. Паводле інфармацыі Eindhovens Dagblad, мужчыну завуць Дзмітрый Вярбіцкі, ён з’яўляецца грамадзянінам Беларусі і жыве ў цэнтры для бежанцаў на Kanaaldijk-Zuid.
Раніцай 9 студзеня ён пайшоў з сябрам па пакупкі. Калі яны падышлі да крамы Praxis, убачылі аўтамабіль у вадзе. Жанчына, якая знаходзілася ўнутры, адчыніла акно і гучна клікала на дапамогу.
Дзмітрый не вагаўся, вытрас усё з кішэняў, аддаў прыяцелю і скочыў у ледзяную ваду. Яму ўдалося выштурхнуць аўтамабіль да супрацьлеглага берага — на Kanaaldijk-Noord, дзе разам з відавочцамі ён дапамог жанчыне выбрацца з салона. Праз некалькі хвілін на месца прыбылі паліцыя і экстраныя службы.
«Там спачатку дапамаглі жанчыне выбрацца з машыны на бераг, а потым мне», — расказаў ён.
Пацярпелую агледзелі медыкі ў машыне хуткай дапамогі, шпіталізацыя ёй не спатрэбілася. Дзмітрыю аказалі дапамогу ў клініцы, а пасля паліцыя даставіла яго назад у цэнтр размяшчэння, дзе ён пражывае. Паводле яго слоў, з выратаванай жанчынай ён больш не бачыўся і не размаўляў.
«Я не ведаю, адкуль у мяне ўзяліся сілы — я проста гэта зрабіў, — расказаў ён журналістам. — Я і не ведаў, што я такі добры плывец».
«Я адчуваю сябе героем, — адказаў ён на пытанне. — Але не Супермэнам або Бэтмэнам. Гэта персанажы з фільмаў. Для мяне герой — гэта любы, хто дапамагае іншым людзям».
Паводле папярэдніх звестак, жанчына рухалася паводле ўказанняў навігатара, занадта рана павярнула перад мостам на Tongelresestraat і з’ехала ў канал.
На наступны дзень пасля здарэння партыя Ouderen Appèl-Hart voor Eindhoven, прадстаўленая ў муніцыпальным савеце, прапанавала мэру і членам гарадскога савета вылучыць Вярбіцкага да афіцыйнага ўшанавання за «гераічны ўчынак».
