Беларусь прапануе Інданезіі адкрыць прамыя авіязносіны і ўвесці бязвізавы рэжым. Пра гэта заявіў міністр замежных спраў Беларусі Максім Рыжанкоў.
“На сустрэчы з маім калегам — міністрам замежных спраў — мы абмеркавалі шырокі пласт пытанняў палітычнага супрацоўніцтва, узаемнай падтрымкі на міжнародных пляцоўках. І тыя рэчы, якія важныя для нашых людзей. Мы гаварылі пра тое, што ўжо ў самы бліжэйшы час Інданезія больш уважліва разгледзіць пытанне аб вызваленні беларускіх грамадзян ад неабходнасці атрымання візы ў аэрапорце для наведвання краіны тэрмінам да 30 дзён.
Гэта была б вельмі добрая магчымасць для пашырэння кантактаў паміж людзьмі. Акрамя таго, мы чакаем адказу інданезійскага боку на нашу прапанову аб запуску прамога рэйса. Гэта таксама была б добрай навіной для турыстаў і прадстаўнікоў бізнесу”, — цытуе Рыжанкова БелТА.
Паводле яго слоў, Інданезія збіраецца адкрыць у Мінску сваё пасольства. Рыжанкоў таксама адзначыў, што ў 2025 годзе тавараабарот з Інданезіяй з улікам паслуг перавысіў 600 млн долараў. Сёлета тавараабарот расце, у тым ліку і беларускі экспарт.
Міністр адзначыў, што, акрамя экспарту калійных угнаенняў, развіваюцца і пастаўкі іншых тавараў.
“Гэта пастаўкі прадуктаў харчавання, сухога малака, сыроваткі. Пастаўкі або зборка нашай тэхнікі ў гэтай краіне, вельмі патрэбнай у тым ліку ў здабыўной прамысловасці і для механізацыі сельскай гаспадаркі. Гэта перанос пэўных тэхналогій сельскагаспадарчага профілю ў гэтую краіну”, — расказаў міністр.
Таксама бакі прапрацоўваюць супрацоўніцтва ў сферы адукацыі: навучанне ў Беларусі інданезійскіх спецыялістаў па розных профілях, уключаючы сельскую гаспадарку, медыцыну, інжынерныя спецыяльнасці.
У Інданезіі Мінск цікавяць закупкі каўчуку, морапрадуктаў, какава-бабоў, пальмавага і какосавага алею, асобных пазіцый апаратуры і тэхнікі, што вырабляюцца ў гэтай краіне.
