Аб’яднаны пераходны кабінет прыняў пастанову, якой прапануецца прызначаць пенсіі і льготы ўдзельнікам беларускага партызанскага супраціву і іх сваякам у выпадку смерці ўдзельнікаў.
«Беларусы і беларускі працягваюць змаганне за дэмакратыю і незалежнасць Беларусі — гэта бясспрэчны факт. На жаль, сённяшняя дзяржава, узурпаваная рэжымам Лукашэнкі, стаіць па другі бок гэтай барацьбы і фактычна вядзе яе супраць тых, ад каго залежыць самое існаванне Рэспублікі Беларусь. Дадзенай пастановай Кабінет паказвае, як любая здаровая дзяржава павінна паводзіць сябе ў дачыненні да тых, хто за яе змагаецца.
Ад сябе хачу дадаць яшчэ адну важную рэч. Тысячы беларусаў і беларусак прайшлі альбо незаконна знаходзяцца ў турмах рэжыму Лукашэнкі. З’яўляюцца палітвязнямі. Гэта праваабарончы статус.
Пастанова Кабінету як протадзяржаўнага інстытуту, у сваю чаргу, фактычна надае гэтым людзям дадатковы статус, адпаведны іх важнай гістарычнай і грамадска-палітычнай ролі ў жыцці Рэспублікі Беларусь. І бярэ на сябе абавязак не толькі зафіксаваць яе на будучыню, але ўжо сёння, зараз змагацца за свабоду кожнага і кожнай з іх даступнымі нам сродкамі, у тым ліку праз міжнародны і санкцыйны ціск», — пракаментаваў пастанову намеснік кіраўніка АПК Павел Латушка.
Прадстаўнік кабінета па абароне і нацыянальнай бяспецы Вадзім Кабанчук адзначыў, што пастанова датычыцца розных груп, якія аказвалі супраціў.
«У гэтай пастанове АПК прадэманстраваў беларусам, што ўсе намаганні, усе высілкі, уся ахвярнасць, якую паказала наша грамадскасць, не будуць забытыя. Кожны герой знойдзе сваю ўзнагароду.
Рух супраціву быў розны, ён эвалюцыяніраваў. Былі, напрыклад, такія групы як «рэйкавыя партызаны», групы Аліневіча, «Чорныя салаўі». Мы звяртаем увагу на ўсе групы патрыётаў, незалежна ад інструментаў барацьбы, выкарыстаных імі.
Мы падкрэсліваем, што цэнім той унёсак людзей і іх ахвярнасць. Гісторыя і час усё расставяць на свае месцы. Гэтыя хлопцы і дзяўчаты войдуць у падручнікі па гісторыі Беларусі як героі», — сказаў ён.
«Для мяне прыняцце гэтай пастановы — гэта перадусім пра прызнанне людзей, якія заплацілі высокую цану за незалежнасць і годнасць Беларусі. Дзяржава павінна бачыць гэты ўнёсак і прымаць на сябе адказнасць за падтрымку такіх людзей.
Дакумент задае аснову для далейшай працы: у яго межах будуць выпрацоўвацца канкрэтныя і рэалістычныя механізмы сацыяльнай дапамогі, рэабілітацыі і гарантый. Мы гаворым пра сістэмныя рашэнні, якія павінны стаць часткай палітыкі пераходнага перыяду.
Вельмі важна, што пастанова ўлічвае і сем’і загінулых. Гэта пытанне справядлівасці і чалавечай салідарнасці, без якіх немагчыма будаваць новую Беларусь.
Наша задача — зрабіць так, каб людзі, якія сталі на абарону свабоды краіны, ведалі: у будучыні дзяржава будзе побач і будзе дзейнічаць адказна», — прыводзіцца каментар прадстаўніцы па сацыяльнай палітыцы Вольгі Зазулінскай.
У пастанове прапісана, што ўдзельнікі руху маюць права ў вызначаным дэмакратычным урадам парадку на штомесячную дапамогу і пенсію не ніжэйшую за сярэднюю пенсію па краіне, прыярытэтны доступ да розных відаў дапамогі, атрыманне дзяржаўнай падтрымкі пры будаўніцтве і набыцці жылля, льготы пры паступленні, бясплатную юрыдычную дапамогу і іншыя меры сацыяльнай абароны.
