ВУП па выніках года можа вырасці ўсяго на 1,1%. За 11 месяцаў, паводле даных Белстата, ён павялічыўся на 1,3%. Пра гэта гаворыцца ў чарговым экспрэс-аналізе, падрыхтаваным у рамках праекта Маніторынг эканомікі Беларусі. Яго аўтары таксама ацанілі эфект ад аслаблення амерыканскіх санкцый супраць беларускага калію ў 300–500 млн долараў у год.
Аўтары аналізу ацэньваюць прырост ВУП у лістападзе прыблізна ў 0,6% у параўнанні з аналагічным месяцам мінулага года. У параўнанні з кастрычнікам гэтага года, з улікам ліквідацыі сезоннасці, ВУП знізіўся на 0,1–0,2%.
“Выпуск прамысловасці скараціўся да сярэднямесячнага ўзроўню даваеннага 2021 года ў асяроддзі аслабленага попыту ў Расіі і вычарпання не задзейнічаных у вытворчасці працоўных рэсурсаў. Рэсурсныя абмежаванні таксама стрымлівалі дынаміку будаўніцтва і, верагодна, будуць лімітаваць выніковасць намаганняў Нацбанка па стымуляванні інвестыцый у будучыні. Падтрымку ВУП у лістападзе аказаў нязначны рост у ІТ-сферы і стрыманае павелічэнне спажывецкіх выдаткаў насельніцтва”, — гаворыцца ў аналізе.
Яго аўтары лічаць, што без моцных пазітыўных шокаў у снежні або перагляду Белстатам ацэнак ВУП у трэцім квартале эканоміка вырасце па выніках года на 1,1%. Гэта будзе адпавядаць зніжэнню ВУП у чацвёртым квартале.
“Перагрэў эканомікі істотна змяншаўся, галоўным чынам з-за аслаблення знешняга попыту, што транслявалася ў зніжэнне праінфляцыйнага ціску. Інфляцыя ў снежні гэтага года чакаецца каля 7% г/г.
Ва ўмовах запаволення эканамічнай актыўнасці і інфляцыі найбольш верагодным бачыцца падтрыманне мяккай эканамічнай палітыкі ў 2026 годзе. Аднак прастора для істотнага павелічэння стымулаў абмежаваная слабым патэнцыялам росту бюджэтных даходаў і пагрозай паскарэння росту коштаў з-за назапашанага інфляцыйнага навісання”, — гаворыцца ў публікацыі.
Аналізуючы выпуск у прамысловасці, яе аўтары адзначаюць, што мацней за ўсё ён знізіўся ў энергетыцы і апрацоўчых галінах. На вытворчасць энергіі паўплываў кліматычны фактар — сярэдняя тэмпература ў лістападзе істотна перавысіла сезонную норму і аказалася максімальнай для гэтага месяца з 2020 года. Найбольшае падзенне апрацоўчых вытворчасцей адзначана ў Мінску і Магілёўскай вобласці, што сігналізуе пра аслабленне машынабудаўнічага сектара на фоне зніжэння інвестыцыйнага попыту ў Расіі. Таксама рэгіянальная дынаміка паказвае на павелічэнне выпуску нафтапрадуктаў на фоне росту паставак бензіну ў Расію. Па выніках года зніжэнне прамвытворчасці можа скласці каля 2%.
“Пры гэтым запасы гатовай прадукцыі не зніжаліся ў апошнія месяцы і заставаліся на максімальных значэннях у XXI стагоддзі. Значны аб’ём запасаў у выпадку захавання стрыманага попыту ў Расіі ў будучым годзе будзе абмяжоўваць патэнцыял аднаўлення выпуску прамысловасці”, — гаворыцца ў публікацыі.
Яе аўтары таксама ацанілі наступствы аслаблення амерыканскіх санкцый у дачыненні да калійнай галіны. Паводле іх меркавання, гэта можа павялічыць выручку ад экспарту ўгнаенняў, але не акажа істотнага ўплыву на фізічныя аб’ёмы паставак. Экспарт угнаенняў чакаецца на ўзроўні каля 12 млн т. Патэнцыйна аслабленне санкцый можа павялічыць валютную выручку на 300–500 млн долараў у год за кошт зніжэння транзакцыйных выдаткаў і дысконту на беларускія ўгнаенні.
“Аднак эфекты для фізічных аб’ёмаў паставак будуць мінімальнымі, бо лагістычныя праблемы (абмежаваная ёмістасць і прапускная здольнасць расійскіх партоў і чыгункі) не будуць ліквідаваныя пры захаванні санкцый ЕС, а выпуск калію ў Беларусі вярнуўся да максімальных аб’ёмаў. Дзякуючы развіццю Нежынскага ГАК патэнцыял вытворчасці калійных угнаенняў павялічыцца, аднак яго рэалізацыя будзе залежаць ад змянення санкцыйнага рэжыму ЕС”, — лічаць аналітыкі.
