Ліквідаваныя ў Мінску махлярскія кол-цэнтры спецыялізаваліся на выкраданнях пад выглядам інвеставання на рынку Forex. Яны дзейнічалі пад выглядам тэлефонных службаў або даведачна-інфармацыйных цэнтраў. Супрацоўнікаў падбіралі на сайтах па пошуку працы, навучалі, правяралі на паліграфе. Прадстаўнікі МУС і СК на прэс-канферэнцыі ў Нацыянальным прэс-цэнтры распавялі падрабязнасці аперацыі.
Па падазрэнні ў махлярстве затрымана 55 чалавек, у тым ліку 45 мужчын і 10 жанчын, з іх восем мужчын і адна жанчына з’яўляюцца замежнымі грамадзянамі. Абвінавачанні ўжо прад’яўлены 18 фігурантам, 17 з іх змешчаны пад варту. Па справе працуе следчая група, у якую ўвайшлі 135 следчых.
Як паведаміў начальнік 5-га ўпраўлення (па Мінску) ГУБАЗіК МУС Сяргей Новік, была атрымана аператыўная інфармацыя аб функцыянаванні чарговых махлярскіх кол-цэнтраў у сталіцы. Былі ўстаноўлены два такія цэнтры, у адным з якіх працавала каля 100 чалавек.
Крымінальная справа была ўзбуджана ў снежні мінулага года. Сілавікі ж наляцелі на кол-цэнтры 17 лютага. Былі праведзены вобшукі ў чатырох офісных памяшканнях і па адрасах пражывання фігурантаў. На “працоўных месцах” знаходзіліся 192 чалавекі, яшчэ 22 былі затрыманы ў сябе дома.
“Дзейнасць дадзеных кол-цэнтраў хавалася за шыльдамі арганізацый, якія аказваюць тэлефонныя і даведачна-інфармацыйныя паслугі. У штат кампаніі, акрамя абзвоншчыкаў, першаснага аддзела, так званага сейлз-аддзела і другаснага аддзела (рытэйн-аддзела), уваходзілі супрацоўнікі тэхнічнай і фінансавай падтрымкі, бізнес-трэнеры, эйчары, менеджары, клоўзеры, паліграфолагі і штатная ахова. Падбор кадраў у кол-цэнтры ажыццяўляўся ў тым ліку на афіцыйных пляцоўках, такіх як rabota.by, praca.by. З патэнцыйнымі супрацоўнікамі праводзілася сумоўе, пасля чаго яны накіроўваліся на двухтыднёвыя курсы.
Падчас дадзеных курсаў альбо пасля іх правядзення кандыдаты падвяргаліся апытанню з выкарыстаннем паліграфа, і пры гэтым будучых працадаўцаў асабліва хвалявалі пытанні адносін кандыдатаў да праваахоўных органаў, таксама наяўнасць, а дакладней сказаць, адсутнасць маральных якасцей у кандыдатаў. Па заканчэнні курсаў усе кандыдаты здавалі залікі. Для абароны ад непажаданых гасцей — так удзельнікі кол-цэнтраў называлі супрацоўнікаў міліцыі — у офісах размяшчаліся трывожныя кнопкі, або, як іх самі называлі кіраўнікі кол-цэнтраў, чырвоныя кнопкі. Выкарыстанне дадзеных кнопак дазваляла імгненна адключаць усе камп’ютары ад сеткі сілкавання, спыняла доступ як да ўнутраных, так і да знешніх інфармацыйных рэсурсаў, блакіравала доступ да сеткі інтэрнэт”, — распавёў Новік.
Па яго словах, выкраданні здзяйсняліся на працягу некалькіх гадоў пад выглядам інвеставання на рынку Forex. Было створана больш за 800 сайтаў, якія прасоўваліся ў сетцы праз таргетаваную рэкламу і іншымі метадамі. У матэрыялах справы ўтрымліваюцца звесткі аб 1600 псеўданімах, якімі карысталіся махляры, размаўляючы з пацярпелымі.
Першапачатковы дэпазіт “кліента” такой інвестплатформы складаў 500 долараў. Гэтыя сродкі адразу ж накіроўваліся на дроп-рахункі.
“Першапачатковая сума прычыненай шкоды, аб якой маюцца звесткі ў матэрыялах крымінальнай справы, складае 290 тыс. беларускіх рублёў. Але, падкрэсліваю, гэтая сума першасная, і мы бачым, што яна будзе ўзрастаць значна мацней, у разы”, — дадаў намеснік начальніка галоўнага ўпраўлення лічбавага развіцця папярэдняга следства СК Сяргей Гамко.
Па яго словах, на дадзеным этапе следства валодае інфармацыяй, што абарот аднаго цэнтра мог складаць ад 600 тыс. да 2 млн долараў у месяц. Сяргей Новік адзначыў, што ў ходзе следства правяраецца інфармацыя аб выкраданні ў грамадзянкі Беларусі 250 тыс. долараў. Усяго ж атрыманы звесткі аб больш чым 1000 пацярпелых грамадзянах нашай краіны.
Злачынная група стварыла развітую інфраструктуру прыкрыцця.
“Зламыснікі стварылі ў Рэспубліцы Беларусь і зарэгістравалі тры суб’екты гаспадарання. Асноўнымі відамі дзейнасці гэтых суб’ектаў гаспадарання з’яўляліся стварэнне рэкламы, аказанне IT-паслуг, а таксама аказанне інфармацыйна-даведачных паслуг”, — дадаў Гамко.
Прадстаўнік СК адзначыў, што большасць з фігурантаў супрацоўнічае са следствам.
“Таксама варта адзначыць, што па абставінах удзелу ў злачыннай дзейнасці кол-цэнтраў у адным з кол-цэнтраў было затрымана і выяўлена 97 асоб, якія таксама дапытаны па абставінах дзейнасці. Яны знаходзіліся ў момант правядзення актыўных мерапрыемстваў у памяшканнях кол-цэнтраў, дзе фактычна ажыццяўлялі свае, скажам так, супрацьпраўныя абавязкі”, — сказаў ён.
Як удакладніў Сяргей Новік, з супрацоўнікаў дадзенага цэнтра па падазрэнні ў здзяйсненні злачынства было затрымана 20 чалавек.
Было праведзена 78 вобшукаў, у ходзе якіх канфіскавана 601 прылада — камп’ютарная тэхніка і носьбіты інфармацыі, а таксама сродкі на суму больш за 790 тыс. беларускіх рублёў, накладзены арышт на 11 аўтамабіляў і 47 рахункаў суб’ектаў гаспадарання, якія выкарыстоўваліся зламыснікамі, дзе заблакавана больш за 1 млн долараў.
Сяргей Гамко таксама назваў заробкі супрацоўнікаў кол-цэнтраў.
“Заработная плата, як ужо гаварылася, складала 500 долараў, але гэта ў першасным аддзеле, у аддзеле махлярскім, які працягваў схіленне грамадзян да ажыццяўлення імі інвеставання, зарплата адрознівалася на 500 долараў, яна складала ад 1000, але многія з іх пры правядзенні следчых дзеянняў ужо паведамілі пра тое, што на рукі яны атрымлівалі ад 3 да 4 тысяч долараў. Кіраўнік двух офісных памяшканняў кол-цэнтраў на тэрыторыі Мінска, яго зарплата складала 5 тысяч долараў”, — сказаў ён.
