Канец лютага і сакавік 2026 года характарызаваліся адноснай стабільнасцю лініі фронту маскоўска-ўкраінскай вайны.
Працягвалася ўкраінскае контрнаступленне на стыку Запарожскай і Днепрапятроўскай абласцей. ВС РФ спрабавалі наступаць у раёне Славянска і Краматорска.
Разгледзім найбольш прыкметныя падзеі месяца, стараючыся вылучыць новыя і адзначыць захаваныя ранейшыя тэндэнцыі.
Агульнае становішча на фронце
Люты і сакавік у цэлым сталі часам рэкордна павольнага прасоўвання акупантаў.
Калі да сярэдзіны лютага паведамлялася аб вызваленні 165 квадратных кіламетраў тэрыторыі ў Днепрапятроўскай і Запарожскай абласцях, то 10 сакавіка начальнік Галоўнага аператыўнага ўпраўлення Генеральнага штаба генерал-маёр Аляксандр Камарэнка заявіў: ад акупантаў вызвалена больш за 400 кв. км у гэтых рэгіёнах.
Пазней у сакавіку маскоўцы зноў пачалі спрабаваць праводзіць атакі на браняванай і легкавой тэхніцы, спрабуючы выкарыстоўваць хуткасць, каб прарвацца праз усё больш шырокую «кіл-зону» — нічыйную тэрыторыю паміж маскоўскімі і ўкраінскімі пазіцыямі, у якой неба кантралюецца ўкраінскімі дронамі.
Ключавым напрамкам намаганняў маскоўцаў у 2026 годзе, відавочна, будзе буйная гарадская агламерацыя ў Данецкай вобласці — гарады Славянск і Краматорск, мяжы паміж якімі фактычна не існуе. Войскі РФ ужо цяпер пачынаюць аперацыі на падыходзе да іх. Калі ў 2026 годзе РФ будзе штурмаваць гэтыя гарады, баі тут могуць стаць ледзь не самай маштабнай і крывавай аперацыяй РФ з часу штурму Марыупаля ў 2022 годзе і Бахмута ў 2023-м.
Знішчэнне акружаных войскаў маскоўцаў у Купянску
Апошнія групы маскоўцаў, якія яшчэ ўтрымліваліся ў Купянску (Харкаўская вобласць), відавочна, былі цалкам узяты ў палон або ліквідаваны за апошні месяц.
Генералы ВС РФ паведамілі Пуціну аб захопе Купянска яшчэ 20 лістапада мінулага года, аднак вельмі хутка высветлілася, што асноўная частка горада знаходзіцца пад кантролем украінскіх войскаў. Асобныя будынкі ў горадзе яшчэ некалькі месяцаў утрымліваліся акружанымі групамі маскоўцаў, але цяпер і ім, відавочна, прыйшоў канец.
«Купянск, Украіна. Населены пункт амаль цалкам заняты ВС Украіны. Пад інфармацыйным прыкрыццём (цішынёй) МО РФ – ВС Украіны вядуць зачыстку астатняга паўночнага ўчастка. Хлопцы з ЦРБ загінулі. Усё», — напісаў маскоўскі прапагандыст Раманаў.
Ракетна-дронавыя ўдары
Украіна ў гэты перыяд актыўна наносіла ўдары па тэрыторыі Расіі, паражаючы нафтаперапрацоўчыя заводы, нафтабазы, электрастанцыі, ваенныя аэрадромы і прамысловыя прадпрыемствы. Адным з найбольш прыкметных эпізодаў стаў удар па Нова расійску 2 сакавіка, у выніку якога былі пашкоджаны караблі Чарнаморскага флоту, уключаючы фрэгат «Адмірал Эссен».
Таксама 10 сакавіка Украіне ўдалося нанесці значную шкоду заводу «Крэмній Эл» у Бранску — буйнаму расійскаму вытворцу мікраэлектронікі для ракет. У комплекс уляцела адразу некалькі ракет, прычым увесь гэты час над заводам вісеў украінскі дрон, здымаючы наступствы ўдараў.
Расія, у сваю чаргу, працягвала наносіць масіраваныя ўдары па тэрыторыі Украіны. Найбольш маштабным стаў абстрэл 7 сакавіка, калі было выкарыстана больш за 500 дронаў і ракет, што прывяло да значных разбурэнняў і ахвяр сярод грамадзянскага насельніцтва, у прыватнасці ў Харкаве. Удары па ўкраінскіх гарадах, энергетычнай інфраструктуры і адміністрацыйных аб’ектах адбываліся практычна штодня.
Наш ваенны эксперт Багдан Кухановіч вядзе «Дзённік вайны» з пачатку поўнамаштабнага ўварвання расійскіх войскаў ва Украіну.
