Польскі фонд «Цэнтр вывучэння грамадскай думкі» (CBOS) апублікаваў справаздачу аб стаўленні палякаў да іншых народаў і этнічных груп. Паводле апытання, праведзенага ў 2026 годзе, негатыўнае стаўленне да беларусаў выказалі 46% рэспандэнтаў.
Аналагічны ўзровень непрыязнасці зафіксаваны ў дачыненні да ромаў. Найбольш негатыўна палякі ставяцца да расіян — пра гэта заявілі 74% удзельнікаў даследавання.
Сёлета рэйтынг самых любімых народаў узначальваюць італьянцы: станоўчае стаўленне да іх выказалі 58% апытаных, пры гэтым толькі 7% заявілі пра непрыязнасць. Высокі ўзровень сімпатыі таксама зафіксаваны да чэхаў (55%), славакаў (52%), англічан (49%) і амерыканцаў (47%). Больш за дзве пятыя апытаных заяўляюць пра сімпатыю да харватаў (45%), шведаў, французаў і галандцаў (па 44%), а таксама літоўцаў (43%) і венграў (41%).
Сацыёлагі адзначаюць, што трэці год запар пагаршаецца стаўленне палякаў да народаў, сімпатыя да якіх прыкметна вырасла адразу пасля поўнамаштабнага расійскага ўварвання ва Украіну — перш за ўсё да амерыканцаў, англічан і ўкраінцаў.
Даследаванне правёў CBOS — спецыялізаваны сацыялагічны цэнтр, які з 1982 года займаецца рэпрэзентатыўнымі для польскага грамадства апытаннямі грамадскай думкі па ключавых сацыяльна-палітычных і эканамічных пытаннях. З пачатку 1990-х гадоў цэнтр штомесяц праводзіць рэгулярныя аглядныя даследаванні, вынікі якіх знаходзяцца ў адкрытым доступе.
