Расійскі цэнтрабанк звярнуўся ў Арбітражны суд горада Масквы з позвай да дэпазітара Euroclear аб спагнанні нанесеных страт.
У Банку Расіі заявілі, што позва пададзена «ў сувязі з незаконнымі дзеяннямі дэпазітарыя Euroclear, якія прычыняюць страты Банку Расіі, а таксама ў сувязі з афіцыйна разглядаемымі Еўрапейскай камісіяй механізмамі прамога або ўскоснага выкарыстання актываў Банку Расіі без згоды Банку Расіі».
У прэс-службе расійскага цэнтрабанка патлумачылі, што шкода заключаецца ў немагчымасці распараджацца належнымі грашовымі сродкамі і каштоўнымі паперамі.
Нагадаем, расійскія актывы былі замарожаныя ў 2022 годзе пасля пачатку поўнамаштабнага ўварвання РФ ва Украіну.
Зараз у ЕС разглядаюцца варыянты выкарыстання расійскіх актываў для падтрымкі Украіны. Банк Расіі сёння таксама заявіў, што рэалізацыя любых падобных планаў будзе аспрэчвацца «ва ўсіх даступных кампетэнтных органах, уключаючы нацыянальныя суды, судовыя органы замежных дзяржаў і міжнародных арганізацый, арбітражы і іншыя міжнародныя судовыя інстанцыі з наступным прывядзеннем у выкананне судовых актаў на тэрыторыі дзяржаў — членаў ААН».
У чацвер, 11 снежня, прадстаўнікі краін Еўразвязу пры Радзе ЕС узгаднілі змяненне правілаў, якое спрашчае падаўжэнне замарозкі расійскіх актываў. Цяпер для яе не спатрэбіцца аднагалоснае рашэнне.
На першым этапе плануецца прыняць рашэнне аб бестэрміновай забароне на вяртанне замарожаных у ЕС сродкаў Расіі, паведаміла Данія, што старшынствуе ў Еўразвязе, у чацвер, 11 снежня.
Пераважная частка расійскіх сродкаў, якія мяркуецца выкарыстоўваць, кіруецца бельгійскай кампаніяй Euroclear. Ідзе гаворка прыкладна пра 185 млрд з 210 млрд еўра, размешчаных у ЕС.
Прем’ер-міністр Бельгіі Барт дэ Вевер раней вылучыў тры ўмовы, пры выкананні якіх Бельгія будзе гатовая падтрымаць ініцыятыву нягледзячы на магчымыя рызыкі. Ён запатрабаваў гарантаваць сумесную адказнасць усіх краін ЕС за магчымыя рызыкі і забяспечыць наяўнасць дастатковых фінансавых гарантый з першага дня рэалізацыі плана для выканання патэнцыйных абавязацельстваў.
