Святлана Ціханоўская правяла брыфінг для паслоў і спецпрадстаўнікоў Літвы, Ірландыі, Італіі, Малдовы, Латвіі, Нідэрландаў, Ізраіля, Фінляндыі, Эстоніі, Харватыі, Вялікабрытаніі, Швецыі, Францыі, Іспаніі, Нарвегіі, Румыніі, ЗША, Германіі, Японіі, Польшчы, Чэхіі і Украіны, а таксама Паўночнага Савета.
Сустрэча адбылася ў Офісе Ціханоўскай у Вільні, які працягвае працу. Ціханоўская падкрэсліла, што Літва застаецца адным з найважнейшых партнёраў беларускіх дэмсіл.
Тэмамі брыфінгу сталі вызваленне палітвязняў, легалізацыя беларусаў за мяжой, праца Офіса Ціханоўскай, міжнародны ціск на рэжым, процідзеянне транснацыянальным рэпрэсіям.
Ціханоўская падзякавала Польшчы за падтрымку і салідарнасць з беларусамі, ЗША — за намаганні па вызваленні палітвязняў, Швецыі, Нарвегіі і Германіі — за падтрымку грамадзянскай супольнасці і незалежных СМІ. Таксама яна падзякавала Іспаніі за прызнанне беларускіх пашпартоў з пратэрмінаваным тэрмінам дзеяння, Малдове — за ўдзел у вызваленні зняволеных, Літве — за ініцыятыву па прыцягненні Лукашэнкі да адказнасці праз МКС.
Яна заклікала партнёраў захоўваць адзінства ў палітыцы ў дачыненні да Беларусі, падтрымліваць беларускія дэмакратычныя інстытуты і незалежныя СМІ, дапамагаць у легалізацыі беларусаў у выгнанні, а таксама не спыняць ціску да вызвалення ўсіх палітвязняў і рэальных сістэмных змен у Беларусі.
«Шлях да свабоднай, дэмакратычнай і еўрапейскай Беларусі складаны, і часам ён можа здавацца вельмі доўгім. Але я ведаю, што мы не адны на гэтым шляху. Побач з беларусамі ёсць сябры і саюзнікі, якія працягваюць падтрымліваць нас. Дзякую вам за гэтую салідарнасць. Менавіта такая падтрымка дае нам сілы працягваць працу дзеля свабоды людзей, дзеля нашай незалежнасці і дзеля дэмакратычнай будучыні Беларусі», — прыводзіць яе словы офіс.
