Аляксандр Лукашэнка сёння прызначыў кіраўніком дзяржаўнай установы «Адміністрацыя Кітайска-Беларускага індустрыяльнага парка “Вялікі камень”» Таццяну Харлап. Яна прыходзіць на гэтую пасаду з пасады генеральнага консула Беларусі ў Ганконгу.
Пасада кіраўніка адміністрацыі «Вялікага каменя» заставалася вакантнай з чэрвеня мінулага года. Тады Аляксандр Ярашэнка, які кіраваў адміністрацыяй на працягу многіх гадоў, быў накіраваны на працу ў Пастаянны камітэт Саюзнай дзяржавы, дзе стаў намеснікам дзяржаўнага сакратара.
Акрамя таго, Аляксандр Лукашэнка ўзгадніў прызначэнні ў Мінсельгасхарчы і Белстаце.
Віталь Кулак зойме пасаду першага намесніка міністра сельскай гаспадаркі і харчавання. Раней ён працаваў на пасадзе намесніка міністра ў гэтым жа ведамстве.
У сваю чаргу пасаду намесніка міністра зойме Ігар Дарафейчык. Да цяперашняга часу ён быў намеснікам дырэктара Дэпартамента ветэрынарнага і харчовага нагляду Мінсельгасхарча.
Намеснікам старшыні Нацыянальнага статыстычнага камітэта прызначаная Ала Біленка. Раней яна ў гэтым ведамстве займала пасаду начальніка галоўнага ўпраўлення каардынацыі і развіцця статыстычнай сістэмы.