Украіна абмяняла дзвюх жыхарак Курскай вобласці на грамадзянку Украіны, якая знаходзілася ў калоніі ў Беларусі. Абмен адбыўся па даручэнні Аляксандра Лукашэнкі, паведаміў губернатар Курскай вобласці РФ Аляксандр Хінштэйн.
«Украінскі бок звярнуўся да Беларусі, каб абмяняць украінку, якая адбывала пакаранне за крымінальнае злачынства. Па даручэнні Прэзідэнта Рэспублікі Аляксандра Лукашэнкі адбыўся яе абмен на дзвюх жыхарак Суджанскага раёна — бабулю і ўнучку 85-ці і 42-х гадоў», — напісаў ён у сваім тэлеграм-канале.
Расіянак даставілі ў бальніцу. Медыкі правялі агляд і ўстанавілі, што шпіталізацыя не патрабуецца. Жанчын даставяць у Курск.
Хінштэйн падзякаваў Лукашэнку і старшыні Гомельскага аблвыканкама Івану Крупко за каардынацыю дзеянняў.
5 і 6 сакавіка Украіна і Расія правялі абмен палоннымі ў фармаце 500 на 500. Украінскі бок паведамляў, што сярод украінцаў, якія вярнуліся сёння, былі дзве грамадзянскія асобы. Абмен праходзіў у пункце пропуску «Новая Гута» на беларуска-ўкраінскай мяжы.
5 сакавіка Лукашэнка падпісаў указ аб памілаванні 18 чалавек. З іх 15 былі асуджаныя па «экстрэмісцкіх» артыкулах. 11 з вызваленых — жанчыны.
