Затрыманаму ў Польшчы за шпіянаж грамадзяніну Беларусі 42 гады. Пра гэта паведаміў на брыфінгу прэс-сакратар міністра-каардынатара спецслужбаў Яцэк Дабжыньскі.
Сёння раніцай Агенцтва ўнутранай бяспекі (ABW) і Нацыянальная пракуратура Польшчы праінфармавалі пра затрыманне 9 лютага грамадзяніна Беларусі Паўла Т. Яму прад’яўлена абвінавачанне ў шпіянажы на карысць беларускай ваеннай разведкі. Ён арыштаваны судом на тры месяцы.
“Супрацоўнікі Агенцтва ўнутранай бяспекі затрымалі 42-гадовага беларуса. Аказалася, што беларус з’яўляецца тыповым сучасным шпіёнам. Ён шпіёніў у Польшчы, а таксама ў Літве і Германіі. Гэты арышт стаў магчымы дзякуючы супрацоўніцтву польскіх спецслужбаў, а менавіта Агенцтва ўнутранай бяспекі, а таксама Літвы і Германіі, што надзвычай важна.
Абмен інфармацыяй, досведам і ведамі па дадзеным пытанні прывёў да арышту гэтага 42-гадовага беларуса ў Польшчы, у Варшаве. Высветлілася, што ён збіраў інфармацыю пра важныя і стратэгічныя месцы ў Польшчы, Літве і Германіі. Ён апрацоўваў, запісваў і перадаваў яе сваім кіраўнікам у Беларусі і Расіі. Апошнім часам расійскія і беларускія спецслужбы сталі вельмі актыўнымі, і для эфектыўнай барацьбы з імі надзвычай важны абмен інфармацыяй паміж спецслужбамі”, — сказаў Дабжыньскі.
Паводле яго слоў, у ABW ужо ёсць 92 падазраваныя ў шпіянажы і сабатажы. Гэта грамадзяне Расіі, Беларусі, Украіны і Польшчы.
Прэс-сакратар паліцыі Катажына Новак дадала, што ў мінулую суботу быў затрыманы яшчэ адзін падазраваны ў шпіянажы. Ён вышукваўся паводле еўрапейскага ордэра на арышт. З ім праводзяцца следчыя дзеянні.
