Прэзідэнт ЗША Дональд Трамп абвясціў пра падпісанне мемарандума з Іранам.
“Пагадненне цалкам падпісана. І праход ужо часткова адкрыты”, — заявіў Трамп пасля прыбыцця на саміт G7, перадае Reuters.
Як паведамілі ў Белым доме, з амерыканскага боку мемарандум падпісалі Трамп і віцэ-прэзідэнт Джэй Дзі Вэнс, а з іранскага — спікер парламента Махамад Галібаф.
Падрабязнасці пагаднення будуць апублікаваныя ў найбліжэйшыя дні. Пры гэтым у пятніцу яшчэ адбудзецца фармальная цырымонія падпісання дакумента.
Рух суднаў у рэгіёне ўжо пачынае аднаўляцца. Амерыканскія чыноўнікі чакаюць значнага росту трафіку ў найбліжэйшы час, а поўнае вяртанне да нормы зойме каля двух тыдняў.
Мемарандум прадугледжвае 60-дзённае спыненне агню. У гэты час будуць працягвацца перамовы. Іран павінен пагадзіцца не мець ядзернай зброі.
Дональд Трамп у сетцы Truth Social заявіў, што Іран ужо даў такую згоду. Таксама ён абверг адзін з пунктаў тэксту, распаўсюджанага іранскімі агенцтвамі. У прыватнасці, ён назваў фэйкам інфармацыю пра тое, што ЗША заплацяць Ірану 300 млн долараў.
Нявызначанасць таксама стварае сітуацыя вакол Лівана. Іранскі бок настойвае, што гаворка ідзе пра спыненне агню ў гэтай краіне, дзе Ізраіль спрабуе знішчыць «Хезбалу». Аднак прэм’ер-міністр Ізраіля Біньямін Нетаньяху прытрымліваецца іншага меркавання. Ён пакідае за сабой права наносіць удары па руху.
