Аграхолдынг «Купалаўскае» спыніць сваё існаванне. Пра гэта па выніках нарады ў Аляксандра Лукашэнкі паведаміў старшыня Магілёўскага аблвыканкама Анатоль Ісачэнка.
«Прэзідэнтам канцэптуальна падтрыманы нашы падыходы: гаспадаркі будуць існаваць, працаваць, развівацца ў тых межах, якія ёсць. Холдынга як такога не будзе. Будуць асобна ўзятыя, самастойныя гаспадаркі са сваім кіраўніком, штатам, тэрыторыяй, разліковым рахункам. Холдынг „Купалаўскі“ закрываецца, а гаспадаркі пераходзяць у камунальную ўласнасць», — сказаў ён, перадае БелТА.
У найбліжэйшы час самастойнымі суб’ектамі гаспадарання стануць «Новагарадзішчанскае», «Любінічы-Агра» і «Вялікія Славені».
У Ісачанкі таксама спыталі, навошта трэба было ўзбуйняць прадпрыемствы, каб цяпер праводзіць зваротны працэс.
«Адназначнага тлумачэння і адказу не можа быць апрыёры. Мы лічым, што на сённяшні дзень для іх больш эфектыўнага развіцця яны павінны быць самастойнымі», — сказаў ён.
«Менавіта работа ў холдынгу з Упраўленнем справамі прэзідэнта дала штуршок, эфект. Упраўленне справамі Прэзідэнта шмат чаго зрабіла, укладвала грошы, і ёсць станоўчы вынік. Магчыма, мы не дасягнулі таго, чаго хацелі, але галоўнае — мы бачым, што для далейшага развіцця трэба прыняць такое рашэнне», — дадаў ён.
Нагадаем, аграхолдынг «Купалаўскае» быў створаны ў чэрвені 2017 года на падставе ўказа №232 «Аб стварэнні гаспадарчага таварыства». У яго склад увайшлі аб’яднаныя акцыянерныя таварыствы Шклоўскага раёна: «Амкадор-Шклоў», «Вялікія Славені» і «Новагарадзішчанскае». Меркавалася, што холдынг стане пляцоўкай для адпрацоўкі сучасных тэхналогій. Ён адносіўся да сістэмы Упраўлення справамі Лукашэнкі.
Аднак у выніку прадпрыемства пастаянна пераследавалі праблемы. Менавіта ў адной з гаспадарак холдынга адбыўся знакаміты эпізод, калі Лукашэнка звярнуў увагу на «абасраную карову». Пасля гэтага былі знятыя з пасад міністр сельскай гаспадаркі і харчавання Леанід Заяц і віцэ-прэм’ер Міхаіл Русы.
У 2020 годзе КДК адзначаў, што меры па развіцці «Купалаўскага» недастаткова эфектыўныя. Паказчыкі прадпрыемства зніжаюцца.
Прадпрыемства неаднаразова атрымлівала дзяржаўную падтрымку. Так, летась яму было выдзелена 3,5 млн рублёў на закупку тэхнікі.
