Продажы грузавікоў МАЗа ў Расіі скараціліся на 43% у 2025 годзе

Продажы грузавікоў МАЗа ў Расіі па выніках 2025 года скараціліся на 43% да 3274 адзінак. Такія даныя апублікавала агенцтва “Автостат Инфо”. Вынікі беларускага завода аказаліся крыху лепшымі, чым у цэлым па рынку. Аб’ём продажаў новых грузавікоў у РФ у мінулым годзе ўпаў на 51% да 61,5 тыс. машын.

Лідарам рынку застаўся КаМАЗ, які паказаў падзенне продажаў на 21% да 18,3 тыс. адзінак. На другім месцы кітайскі Sitrak (-61%, 7,6 тыс. машын), а на трэцяе месца напрыканцы года вярнуўся ГАЗ (-38%, 4,7 тыс.), выцесніўшы брэнд з КНР Shacman (-70%, 4,67 тыс.).

У снежні расійскі рынак скараціўся на 23% да 8686 грузавых аўтамабіляў. Продажы МАЗа ў апошні месяц года знізіліся на 28% да 415 адзінак.