Польшча пачынае разгортванне антыдронавай сістэмы «Сан». Сёння ў прысутнасці прэм’ер-міністра Дональда Туска і міністра абароны Уладзіслава Касіняка-Камыша былі падпісаны кантракты на пастаўку абсталявання, узбраення і інтэграцыю сістэмы. Рэалізоўваць яго будзе кансорцыум, які складаецца з Польскай зброевай групы, прыватнай кампаніі APS і нарвежскай Kongsberg. Чакаецца, што сістэма будзе разгорнута на працягу двух гадоў. Яе кошт ацэньваецца ў 15 млрд злотых (каля 4,3 млрд долараў).
«Мы маем справу з абсалютным прарывам у пытаннях эфектыўнай і дзейснай абароны польскай, еўрапейскай і натаўскай усходняй мяжы, а таксама ў найбольш адчувальным элеменце — супрацьпаветранай абароне, перш за ўсё абароне ад сучасных метадаў агрэсіі», — заявіў прэм’ер-міністр Дональд Туск.
Паводле слоў Уладзіслава Касіняка-Камыша, мяркуецца атрымаць 18 антыдронавых батарэй, 52 агнявыя ўзводы, 18 узводаў кіравання, больш за 700 машын рознага прызначэння.
“Усё гэта азначае, што мы будзем надзвычай эфектыўнымі ў супрацьдзеянні пагрозам, якія зыходзяць з усходу. Ноч з 9 на 10 верасня, калі было парушана наша паветраная прастора і расійскія беспілотныя лятальныя апараты ўпершыню з’явіліся над тэрыторыяй НАТА, стала паваротным момантам”, — сказаў ён.
Паводле інфармацыі польскага Міністэрства абароны, сістэма «Сан» будзе складацца з зенітных батарэй, кожная з якіх будзе ўключаць тры агнявыя ўзводы і ўзвод падтрымкі. Пры гэтым кожны агнявы ўзвод будзе валодаць магчымасцямі для самастойнага выяўлення, адсочвання, ідэнтыфікацыі і паражэння паветраных цэляў. Як піша Defence24, узводы будуць аснашчаны 30-мм і 35-мм гарматамі, 12,7-мм кулямётамі, малымі ракетамі-перахопнікамі, дронамі-камікадзэ, сродкамі радыёэлектроннай барацьбы. Мяркуецца, што «Сан» зможа змагацца не толькі з ударнымі дронамі тыпу шахед-гербера, але і з больш дробнымі беспілотнікамі.
«Сан» стане яшчэ адным узроўнем польскай сістэмы ППА, у складзе якой ужо разгорнуты «Вісла» на базе ЗРК сярэдняй далёкасці Partiot, «Нарэў» на базе ЗРК малой далёкасці CAMM, а таксама «Піліца» і «Піліца+» на базе зенітных гармат і ПЗРК Grom і Piorun.
