Перамовы ў Берліне па мірным плане працягнуцца ў панядзелак. Пра гэта паведаміў спецыяльны пасланнік прэзідэнта ЗША Стыў Уіткаф.
“Сустрэча ў Берліне паміж прэзідэнтам Зяленскім, спецыяльным пасланнікам Уіткафам, Джарэдам Кушнэрам і дэлегацыямі з ЗША і Украіны доўжылася больш за пяць гадзін. Прадстаўнікі правялі паглыбленыя дыскусіі па мірным плане з 20 пунктаў, эканамічнай павестцы і іншых пытаннях. Быў дасягнуты значны прагрэс, і заўтра раніцай адбудзецца паўторная сустрэча”, — напісаў ён у нядзелю ўвечары.
Дарадца прэзідэнта Украіны па камунікацыях Дзмітрый Літвін таксама паведаміў Handelsblatt, што перамовы працягнуцца ў панядзелак.
“Заўтра, у панядзелак, у Берліне працягнуцца спробы выступіць пасярэднікам у патэнцыйным спыненні агню паміж Украінай і Расіяй. Канкрэтныя прапановы, якія знаходзяцца на разглядзе, пакуль не раскрываюцца”, — сказаў ён.
Таксама чакаецца, што сёння ў Берліне адбудзецца і сустрэча лідараў Францыі, Вялікабрытаніі, Італіі, Нідэрландаў і Германіі.
