(Абноўлена) Памёр біскуп-эмерыт Казімір Вялікаселец, які на працягу многіх гадоў служыў генеральным вікарыем Пінскай епархіі. Пра гэта паведамляе Katolik.life са спасылкай на вернікаў.
Паводле інфармацыі рэсурсу, раніцай 8 лютага іерарх яшчэ здзяйсняў нядзельную святую імшу ў Гомелі, дзе ў апошнія гады пражываў пры касцёле. Пазней яму стала дрэнна, біскупа даставілі ў рэанімацыю, аднак выратаваць яго не ўдалося.
Казіміру Вялікасельцу было 80 гадоў. Свой апошні дзень нараджэння ён адзначыў 5 мая 2025 года. Ён з’яўляўся найстарэйшым каталіцкім біскупам Беларусі.
Дапоўнена:
Як піша Catholic.by, 8 лютага 2026 года Казімір Вялікаселец памёр у Гомелі. Інфармацыю пра пахаванне абяцаюць паведаміць дадаткова.
Казімір Вялікаселец нарадзіўся 5 мая 1945 года ў вёсцы Стараволя Пружанскага раёна. Будучы іерарх прайшоў службу ў войску і працаваў на будоўлі ў Вільнюсе, дзе пазнаёміўся з ордэнам дамініканцаў, з якім пазней звязаў сваё святарскае служэнне.
Праз адмовы ўладаў ён некалькі гадоў не мог паступіць у духоўную семінарыю і нелегальна вывучаў багаслоўе. У 1981 годзе быў прыняты ў Рыжскую духоўную семінарыю, а ў 1984 годзе пасвечаны ў святары. Служыў у парафіях Пінскай дыяцэзіі, сумяшчаючы пастырскую дзейнасць з аднаўленнем храмаў.
У 1992 годзе быў прызначаны генеральным вікарыем Пінскай дыяцэзіі. Біскупскую хіратанію прыняў 24 чэрвеня 1999 года ў Пінску. Пазней жыў і служыў у Гомелі, дзе пры яго ўдзеле была зарэгістравана новая каталіцкая парафія і распачата будаўніцтва касцёла.
У 2021 годзе быў прызначаны апостальскім адміністратарам Мінска-Магілёўскай архідыяцэзіі, пазней працягваў служэнне як дапаможны біскуп Пінскай дыяцэзіі.
