Міністэрства працы і сацыяльнай абароны чакае, што высокі попыт на рабочую сілу ў Беларусі захаваецца. Пра гэта ў інтэрв’ю беларускаму тэлебачанню распавяла намесніца міністра Таццяна Астрэйка.
«У нас сёння кожны пяты работнік або знаходзіцца ў пенсійным узросце, або ўжо пенсіянер. Таму, безумоўна, з аднаго боку, гэта пераемнасць вопыту, ведаў, кампетэнцый, гэта велізарны шанец і магчымасць для моладзі хутчэй і мякчэй пагрузіцца ў прафесію. Зноў жа скажу, што моладзь і больш сталыя, скажам так, нашы работнікі, яны як такія не канкуруюць на рынку працы, таму што яны займаюць розныя прафесійныя нішы, і яны абодва з’яўляюцца ўзаемадапаўняльнымі і карыснымі.
З другога боку, гэта рост эканомікі, рост эканомікі выклікае патрэбу ў дадатковых кадрах. Калі мы паглядзім, хто заяўляе гэтыя 160 тыс. вакансій, то гэта якраз прамысловасць, гандаль, сельская гаспадарка. Менавіта гэтыя сферы, драйверы ВУП, яны, развіваючыся, фарміруюць попыт на дадатковую патрэбу ў кадрах. Але кадры гэтыя, у тым ліку, неабходныя на новых высокапрадукцыйных працоўных месцах. Таму патрабаванні да іх, вядома, іншыя — патрэбныя іншыя веды, уменні і навыкі. І вось тут вельмі важна, каб працавала сістэма прафесійнай адукацыі, падрыхтоўка кадраў менавіта пад запыт эканомікі, тое, што трэба.
Мы не можам сабе дазволіць марнатраўства, калі мы будзем рыхтаваць не тых, хто патрэбны эканоміцы, асабліва ва ўмовах дэфіцыту кадраў. Менавіта таму Міністэрства працы і сацабароны змяняе падыходы да фарміравання прагнозу патрэб эканомікі ў кадрах. І вось гэты прагноз будзе пакладзены потым у аснову заказу на падрыхтоўку кадраў і выкарыстаны сістэмай адукацыі», — распавяла яна.
Паводле яе слоў, 70% вакансій прадстаўлены рабочымі на вытворчасці. Таксама неабходныя кіроўцы грузавых аўтамабіляў, прадаўцы, кухары, будаўнікі.
«Мы зрабілі, падрыхтавалі прагноз на перыяд да 2030 года, хто ж будзе патрэбны эканоміцы. Напэўна, не дзіўна, зыходзячы з бягучай сітуацыі, мы разумеем, што патрэба будзе зноў жа ў рабочых, прычым з сярэдняй спецыяльнай і прафесійна-тэхнічнай адукацыяй — гэта з аднаго боку. Безумоўна, гэта не змяншае патрэбы ў інжынерных кадрах, гэта адназначна захаваецца.
Акрамя таго, ІТ-сектар. Мы назіраем ажыўленне па колькасці занятых у сектары інфармацыі і сувязі. Гэты сектар узначальвае рэйтынг заробкаў у нашай краіне. Мы бачым, што ідзе трансфармацыя ў гэтым сектары. Гэта не толькі праграмісты. Гэта тыя людзі, якія звязаныя са штучным інтэлектам, якія навучаюць штучны інтэлект. Вельмі важна для гэтага сектара тое, што ІТ пранізвае абсалютна ўсе сферы эканомікі. Менавіта гэтыя спецыялісты ў гэтай галіне неабходныя ўсюды, таму мы прагназуем захаванне попыту.
З іншага боку, мы бачым, што захоўваецца дастаткова вялікая замяшчальная патрэба ў спецыялістах у сферы адукацыі, аховы здароўя. Менавіта там занята максімальная колькасць узроставых, скажам так, работнікаў. Таму ў перспектыве мы павінны падумаць пра тое, і ўжо гэта робім, каб падрыхтаваць на замену кадры. Гэта абавязкова, гэта наша прафесійная, працоўная, скажам так, бяспека ў гэтым плане.
Акрамя таго, рост колькасці асоб старэйшых за 75 гадоў, ён, натуральна, прадугледжвае рост патрэбы ў сацыяльных паслугах. Таму адназначна паслугі па доглядзе за пажылымі людзьмі таксама будуць у топе. І актыўна заклікаю моладзь далучацца да нашай кампаніі і аказваць сацыяльныя паслугі», — сказала яна.
Трэба адзначыць, што работнікі сацыяльнай сферы пры гэтым маюць адны з самых нізкіх сярэдніх заробкаў у краіне.
