Прэс-служба МУС паведаміла пра раскрыццё аферы з пастаўкамі сыравіны на адным з дзяржаўных прадпрыемстваў лёгкай прамысловасці Гомельскай вобласці. Паводле версіі міліцыі, саўдзельнікі, уключаючы гендырэктара, за тры гады выкралі 1,4 млн рублёў.
У паведамленні МУС гаворыцца, што ў змову ўступілі 51-гадовы гендырэктар прадпрыемства і 46-гадовы кіраўнік камерцыйнай структуры. Яны арганізавалі фіктыўную пастаўку сыравіны на адрас прадпрыемства. Паводле версіі міліцыі, гендырэктар даваў указанні “падначаленым аб падрыхтоўцы падложных дакументаў па правядзенні працэдур закупак камплектуючых, прызнанні пераможцы тэндараў, прыёмцы тавару на склад, а таксама аб выкарыстанні матэрыялаў у вытворчасці і наступнай рэалізацыі гатовай прадукцыі”.
У выніку менш чым за тры гады было выкрадзена 1,4 млн рублёў. Грошы ўдзельнікі схемы трацілі на асабістыя патрэбы: куплю дарагіх аўто, абсталявання, добраўпарадкаванне і будаўніцтва дамоў.
З роліка, апублікаванага МУС, вынікае, што гаворка ідзе пра абутковае прадпрыемства — прадэманстравана выява дагавора пастаўкі накладак з успененай гумы для 40 тыс. пар абутку. На падэшве бачны лагатып ААТ “Труд”.
Узбуджана крымінальная справа.
