Аляксандр Лукашэнка падчас сустрэчы з дзяржсакратаром СД Сяргеем Глазьевым заявіў, што на перамовах з ЗША не вырашае свае праблемы за кошт Расіі.
Паводле яго слоў, не варта перажываць з-за палітыкі прэзідэнта ЗША Дональда Трампа. Яго тактыка — націснуць, а потым адступіць. Ён адзначыў, што цудоўна сябе адчувае ў перамовах з амерыканскім бокам.
«Гэта яго тактыка. Моцная краіна, магутная, лідар у свеце. Ну такая тактыка ў яго. І не трэба тут на яго накатваць, навальвацца і іншае. Я яго тут не абараняю, але гэта сапраўды так. Гэта яго тактыка. Мы гэта цудоўна адчуваем па перамовах са Злучанымі Штатамі Амерыкі. І нам удаецца ў гэтых перамовах вырашаць свае праблемы», – сказаў Лукашэнка.
«Але ні ў якім разе мы не вырашаем гэтыя праблемы за кошт братэрскай і роднай нам Расіі», – падкрэсліў ён.
Нагадаем, у мінулым годзе ў выніку перамоў Лукашэнкі і спецпасланніка Трампа Джона Коўла, а таксама прадстаўнікоў Дзярждэпартамента былі аслаблены амерыканскія санкцыі ў дачыненні да «Белавія» і айчыннай калійнай галіны. Лукашэнка пры гэтым вызваліў і выслаў з Беларусі частку палітвязняў.
