Аляксандр Лукашэнка сёння прыняў даверчыя граматы 10 паслоў. Іх уручылі прадстаўнікі Алжыра, Ганы, Егіпта, Самалі, Танзаніі, Палестыны, Бангладэш, КНДР, Шры-Ланкі і Японіі.
Вітаючы алжырскага дыпламата, Лукашэнка нагадаў яму пра дамоўленасць з прэзідэнтам Алжыра аб дасягненні тавараабароту ў 500 млн долараў да 2027 года.
“Нам ёсць што прапанаваць для супрацоўніцтва. Гэта не проста запатрабаваная сельскагаспадарчая тэхніка, але і комплексныя рашэнні па забеспячэнні харчовай бяспекі, якія адаптуюцца спецыяльна пад патрэбы вашай краіны”, – сказаў Лукашэнка паслу Ганы, нагадаўшы, што чакае прэзідэнта гэтай краіны з візітам у чэрвені.
Ад пасла Егіпта ён чакае актыўнага садзейнічання ў развіцці дзелавых сувязяў і нарошчванні тавараабароту. Для гэтага ёсць і патэнцыял, і інструменты, уключаючы сумесную гандлёвую камісію.
Паслу Самалі Лукашэнка паабяцаў падставіць плячо ў аднаўленні дзяржаўнасці.
“Самалі перажывае цяпер новы перыяд сваёй гісторыі. Пасля дзесяцігоддзяў канфліктаў аднаўляецца структура дзяржаўнай улады. Прымаюцца меры па павышэнні ўзроўню жыцця насельніцтва. Гатовы падставіць плячо ў гэтай важнай працы”, – сказаў ён.
Прадстаўніку Танзаніі Лукашэнка прапанаваў нарошчваць аб’ёмы гандлю, якія пакуль невысокія.
“На працягу многіх гадоў Беларусь і Палестына падтрымліваюць дружалюбны дыялог. Мы з болем у сэрцы назіралі за падзеямі ў сектары Газа, ахвярамі якіх сталі дзясяткі тысяч палестынцаў. Неабходна дамагчыся поўнага спынення насілля і пашырыць магчымасці для дастаўкі ў рэгіён гуманітарнай дапамогі”, – сказаў ён паслу Палестыны.
Вітаючы пасла Бангладэш, Лукашэнка прапанаваў падзяліцца тэхналогіямі ў сельскай гаспадарцы, сферах абароны водных рэсурсаў, перапрацоўкі адходаў і па іншых цікавых напрамках.
“Мы гатовы развіваць узаемавыгаднае супрацоўніцтва ў інтарэсах нашых народаў і цвёрда маем намер рэалізоўваць дасягнутыя на вышэйшым узроўні дамоўленасці”, – сказаў ён паслу КНДР.
У размове з паслом Шры-Ланкі Лукашэнка адзначыў, што многія ланкійскія лекары скончылі беларускія ВНУ, і запрасіў вучыцца жыхароў гэтай краіны па інжынерных, аграрных, гуманітарных і іншых спецыяльнасцях.
“Росту даверу паміж нашымі краінамі традыцыйна садзейнічала рэалізацыя праектаў у гуманітарнай сферы. Пасля аварыі ў Фукусіме мы накіроўвалі гуманітарную дапамогу, а вашы дзеці прыязджалі да нас на аздараўленне. Беларусь наведалі больш за 400 японскіх экспертаў, якія вывучалі досвед пераадолення наступстваў Чарнобыля. Прапаную працягнуць узаемавыгаднае супрацоўніцтва, у першую чаргу ў сферы аховы здароўя”, – сказаў Лукашэнка паслу Японіі.
